काठमाडौँ :- ऊर्जा, शहरी विकास तथा भौतिक पूर्वाधार तथा यातायातमन्त्री कुलमान घिसिङले पदबाट राजीनामा दिएका छन्। घिसिङले बुधबार राति पत्रकार सम्मेलन गर्दै राजीनामा दिएको घोषणा गर्नुभएको हो।
उहाँले बुधबार राति नै प्रधानमन्त्री सुशिला कार्कीलाई आफ्नो राजीनामा बुझाउनुभएको जनाइएको छ। नागरिक सरकारमा बसेर दलगत गतिविधिमा संलग्न भएको आरोप लागेपछि प्रधानमन्त्री कार्कीले राजीनामा दिन आग्रह गरिसकेको अवस्थामा पनि पदमा कायम रहेको भन्दै घिसिङको चर्को आलोचना हुँदै आएको थियो।
मंगलबार आयोजित एक कार्यक्रममा घिसिङले आफू अहिलेसम्म कुनै राजनीतिक दलमा आवद्ध नरहेको दाबी गरेपछि आलोचना अझ बढेको थियो। प्रधानमन्त्री कार्कीले दलको गतिविधिमा संलग्न भएको आरोप लगाउँदै घिसिङसहित सञ्चारमन्त्री जगदीश खरेल र खेलकुदमन्त्री बब्लु गुप्तालाई समेत राजीनामा दिन निर्देशन दिएकी थिइन्।
गत भदौ २३ र २४ गते भएको जेनजी आन्दोलनपछि गठन भएको सुशिला कार्की नेतृत्वको सरकारमा घिसिङलाई भदौ २९ गते ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्रालयको जिम्मेवारी दिइएको थियो। उहाँले भदौ ३० गते मन्त्री पदको शपथ ग्रहण गर्नुभएको थियो।
