बुटवल :- बुटवल उप–महानगरपालिका–०९ तिनकुनेमा नेवा: द्यः दवु नगर समिति तथा नेवा: मिसा दवु नगर समितिको संयुक्त आयोजनामा योमरी खाना महोत्सव भव्य रूपमा सम्पन्न भएको छ।
नेवारी मौलिक संस्कृति, परम्परा र खानपानको संरक्षण तथा प्रवर्द्धन गर्ने उद्देश्यले आयोजना गरिएको महोत्सवमा विभिन्न प्रकारका परम्परागत योमरी तथा अन्य नेवारी परिकारहरू प्रदर्शनी तथा बिक्रीका लागि राखिएका थिए। महोत्सवमा स्थानीय बासिन्दा, संस्कृति प्रेमी तथा युवाहरूको उल्लेख्य सहभागिता रहेको आयोजकले जनाएको छ।
कार्यक्रमका अध्यक्ष सुबिन श्रेष्ठले यस्ता सांस्कृतिक कार्यक्रमहरूले नयाँ पुस्तालाई आफ्नै मौलिक पहिचान र संस्कृतिप्रति आकर्षित गर्न महत्वपूर्ण भूमिका खेल्ने बताउनुभयो। उहाँले आगामी दिनमा पनि नेवारी भाषा, कला र संस्कृतिको संरक्षणका लागि यस्ता कार्यक्रमहरू निरन्तर आयोजना गरिने प्रतिबद्धता व्यक्त गर्नुभयो।
महोत्सवले नेवारी समुदायबीच आपसी सद्भाव बढाउनुका साथै स्थानीय पर्यटन प्रवर्द्धनमा समेत टेवा पुर्याएको सहभागीहरूको भनाइ छ।
