भैरहवा:- भैरहवा गोस्पेल क्रिश्चियन फेलोशिपको आयोजनामा भैरहवामा क्रिसमस तथा आगामि नयाँ वर्ष २०२६ को अवसरमा विशेष शुभकामना कार्यक्रम सम्पन्न भएको छ।
सिद्धार्थनगर–६ क्षेत्रमा आयोजित कार्यक्रममा स्थानीय ख्रीष्टियन समुदायको उल्लेख्य सहभागिता रहेको थियो। कार्यक्रममा प्रभु येशू ख्रीष्टको जन्मको स्मरण गर्दै प्रार्थना, भजन तथा शुभकामना आदान–प्रदान गरिएको थियो।
आयोजकका अनुसार कार्यक्रममार्फत समाजमा शान्ति, प्रेम र भाइचाराको सन्देश प्रवाह गर्ने उद्देश्य राखिएको छ। कमल सुनारका अनुसार भैरहवा गोस्पेल क्रिश्चियन फेलोशिप धार्मिक गतिविधिसँगै सामाजिक सद्भाव, नैतिक मूल्य र समुदाय सेवाको प्रवर्द्धनमा निरन्तर सक्रिय रहँदै आएको छ।
संस्थाले विभिन्न कार्यक्रममार्फत सदस्यहरूलाई एकताबद्ध गर्दै सकारात्मक सामाजिक सन्देश फैलाउँदै आएको जनाइएको छ। कार्यक्रमले धर्म, संस्कृति र सहअस्तित्वको महत्व उजागर गर्नुका साथै नयाँ वर्ष २०२६ लाई आशा, विश्वास र शान्तिको वर्षका रूपमा स्वागत गर्ने सन्देश दिएको छ।
