बुटवल:-लियो क्लब अफ बुटवल गोल्डेन जुब्लीले क्लबका संस्थापक अध्यक्ष लियो लायन भेषराज पोख्रेल (राज) को जन्मदिनको अवसरमा रक्तदान कार्यक्रम आयोजना गरेको छ। लुम्बिनी प्रादेशिक अस्पताल, बुटवलमा आयोजित कार्यक्रममा करिब ८० जना युवाले रक्तदान गरेका छन्।
कार्यक्रममा बोल्दै क्लबका अध्यक्ष लियो लक्ष्मण खनालले आफ्नो कार्यकालको पहिलो कार्यक्रम रक्तदानजस्तो मानवीय सेवाबाट सुरु गर्न पाउँदा गर्व र खुसी लागेको बताउनुभयो। उहाँले आगामी दिनमा पनि समाजसेवामूलक कार्यक्रमलाई निरन्तरता दिने प्रतिबद्धता व्यक्त गर्नुभयो।
कार्यक्रममा लुम्बिनी प्रादेशिक अस्पतालका प्रशासन प्रमुख प्रेम गौतम प्रमुख अतिथि तथा नेपाल स्वयंसेवी रक्तदाता समाज, रुपन्देहीका अध्यक्ष कृष्ण चौहान विशेष अतिथिका रूपमा उपस्थित हुनुहुन्थ्यो।
प्रमुख अतिथि गौतमले युवाहरू अस्पतालमै आएर रक्तदान गरेको कार्यको प्रशंसा गर्दै अस्पतालमा रगतको अभाव हुन नदिने तथा सर्वसाधारण बिरामीले सहज रूपमा रगत प्राप्त गर्ने वातावरण बनाउन अस्पताल प्रतिबद्ध रहेको बताउनुभयो।
विशेष अतिथि चौहानले सरकारले तोकेको मापदण्डअनुसार रक्तसञ्चार सेवा सञ्चालन हुनुपर्ने आवश्यकता औँल्याउँदै आगामी दिनमा सेवाग्राहीले अत्यन्तै न्यून शुल्कमा रगत प्राप्त गर्ने व्यवस्था सुनिश्चित गर्न सम्बन्धित निकायले ध्यान दिनुपर्ने धारणा राख्नुभयो।
क्लबका संस्थापक अध्यक्ष भेषराज पोख्रेल (राज)ले आफ्नै जन्मदिनलाई सामाजिक सेवासँग जोड्दै रक्तदान कार्यक्रम आयोजना गरिएकोमा खुसी व्यक्त गर्दै कार्यक्रम सफल बनाउन योगदान पुर्याउने सम्पूर्णप्रति कृतज्ञता व्यक्त गर्नुभयो।
कार्यक्रम संयोजक गोकुल भण्डारीका अनुसार बिरामीका आफन्तले ब्लड बैंक धाउनुपर्ने बाध्यता कम गर्दै सरकारी अस्पतालमै सहज रूपमा रगत उपलब्ध गराउने उद्देश्यले कार्यक्रम आयोजना गरिएको हो।
कार्यक्रममा क्लबका पूर्व अध्यक्षहरू लियो लायन श्रीधर बस्याल, सुनिल कुँवर, जीवन थापा क्षेत्री, अशोक श्रेष्ठ लगायतको उल्लेखनीय उपस्थिति रहेको थियो।
कार्यक्रममा क्लबका उपाध्यक्ष कविराज भुसालले स्वागत मन्तव्य व्यक्त गर्नुभएको थियो। द्वितीय उपाध्यक्ष लियो खिम थापाले धन्यवाद ज्ञापन गर्नुभएको थियो भने सचिव कुशल पाण्डेले कार्यक्रम सञ्चालन गर्नुभएको थियो।
