बुटवल:- नेपाली समाजमा दाजु–बहिनीको अटुट माया, आमाबाबुको अथाह ममता र विवाहपछि छोरीको बिदाइको भावनालाई केन्द्रमा राखेर तयार गरिएको नयाँ तीज गीत सार्वजनिक भएको छ।
परिवारको प्रेम, संस्कार, आत्मीयता र बिछोडको वास्तविक कथालाई समेटिएको गीतले विवाहपछि माइती छोडेर पराइघर जानुपर्ने छोरीको भावुक क्षणलाई मार्मिक रूपमा प्रस्तुत गरेको छ। “नरोऊ दाजु, नरोऊ बाबा, नरोऊ आमा, म त दुई दिनमै फेरि भेट्न आउँछु” भन्ने भावनात्मक सन्देशले गीतलाई अझ हृदयस्पर्शी बनाएको छ।
गीतमा देव न्यौपाने, लक्ष्मी अधिकारी र रिना परियारको सुमधुर स्वर रहेको छ। म्युजिक भिडियोमा देव न्यौपाने, सञ्जिता मगर, कुसुम काफ्ले र शंकर अधिकारीको अभिनय रहेको छ।
गीतको कोरियोग्राफी तथा निर्देशन किशोर थापाले गर्नुभएको हो भने छायांकन दुर्गा प्रसाद कुमाल, रेकर्डिङ कमल राना, सम्पादन तथा रङ संयोजन प्रेम गुरुङ र मेकअप आश्मिता परियारले गर्नुभएको छ।
सार्वजनिक गरिएको यस तीज गीतले नेपाली परिवारका हरेक सदस्यको भावना, माया र आत्मीयतालाई जीवन्त रूपमा प्रस्तुत गर्दै तीजका अवसरमा दर्शक तथा श्रोतामाझ विशेष स्थान बनाउन सफल हुने निर्माण पक्षले विश्वास व्यक्त गरेको छ।
