बुटवल:- लियो जिल्ला परिषद् ३२५ पि, नेपालको आयोजनामा सचिवस्तरीय कार्यशाला सफलतापूर्वक सम्पन्न भएको छ। जिल्लाअन्तर्गतका विभिन्न लियो क्लबका सचिवहरूको क्षमता अभिवृद्धि गर्ने उद्देश्यले आयोजना गरिएको कार्यशालामा क्लब सञ्चालन, अभिलेख व्यवस्थापन, बैठक सञ्चालन प्रक्रिया, प्रतिवेदन लेखन तथा प्रभावकारी सञ्चारसम्बन्धी विषयमा प्रशिक्षण प्रदान गरिएको थियो।
कार्यशालाका प्रमुख अतिथि लायन इन्टरनेशनल ३२५ पि, नेपालका एमजेएफ सन्दीप कसोधन रहनु भएको थियो भने जिल्ला क्याबिनेट सेक्रेटरी एमजेएफ एमएल पाण्डे विशिष्ट अतिथिका रूपमा उपस्थित रहनु भएको थियो। कार्यक्रममा अध्यक्षका रूपमा लियो जिल्ला परिषद् ३२५ पि नेपालका अध्यक्ष श्रिघर बस्याल तथा उपाध्यक्ष सुष्मा बस्यालको समेत उपस्थिति रहेको थियो।
कार्यक्रममा बोल्दै अध्यक्ष श्रिघर बस्यालले सचिवहरूका लागि यस्ता क्षमता विकासमूलक कार्यक्रमहरू क्लबहरूको प्रभावकारी सञ्चालनका लागि अत्यन्त आवश्यक रहेको उल्लेख गर्दै आगामी दिनमा पनि यस्ता कार्यक्रम निरन्तर आयोजना गर्न जिल्ला परिषद् सधैं तयार रहेको बताउनुभयो।
जिल्ला क्याबिनेट सेक्रेटरी एमजेएफ एमएल पाण्डेले लियो तथा लायन्स आन्दोलनको परिचय दिँदै समाजमा यसले गर्दै आएको सामाजिक सेवामूलक गतिविधिबारे जानकारी गराउनुभयो।
प्रमुख अतिथि तथा कार्यक्रम अध्यक्ष एमजेएफ सन्दीप कसोधनले सचिवहरूको भूमिकाको महत्व औँल्याउँदै कार्यक्रम र बैठकका माईनुट फरक–फरक तरिकाले स्पष्ट, व्यवस्थित र उद्देश्यअनुसार लेख्नुपर्नेमा जोड दिनुभयो।
त्यस्तै प्रशिक्षक तथा लियो जिल्ला परिषद् ३२५ पि, नेपालका लियो एड्भाइजर सन्तोष खरेलले लियो क्लबको प्रशासनिक व्यवस्थापनलाई प्रभावकारी बनाउन सचिवको भूमिका अत्यन्त महत्वपूर्ण हुने उल्लेख गर्नुभयो। साथै, MY LCI अपडेट सम्बन्धी तालिम अन्तर्गत क्लबका गतिविधिहरू रिपोर्टिङ गर्ने तरिका, नयाँ सदस्यको विवरण अपलोड गर्ने प्रक्रिया, सदस्य निष्कासनलगायत विविध प्राविधिक विषयमा सहभागीहरूलाई प्रशिक्षण दिइएको थियो।
कार्यशालामा सहभागी लियो क्लब अफ बुटवल सेन्ट्रलका सचिव सुदीप ज्ञवालीले कार्यक्रम अत्यन्त उपयोगी, व्यवहारिक तथा ज्ञानवर्धक रहेको प्रतिक्रिया दिनुभयो।
लियो जिल्ला परिषद् ३२५ पि, नेपालले आगामी दिनमा पनि नेतृत्व विकास तथा क्षमता अभिवृद्धिसँग सम्बन्धित यस्ता कार्यक्रमहरू निरन्तर आयोजना गर्ने प्रतिबद्धता जनाएको छ।कार्यक्रमको सञ्चालन लियो जिल्ला परिषद् ३२५ पि, नेपालका सचिव तथा कार्यक्रमका आयोजक लियो श्रिधर कुँवरले गर्नुभएको थियो।
