सुनवल :- विश्व दृष्टि दिवसको अवसरमा लायन्स क्लब अफ बुटवल सेन्ट्रलले सुनवल नगरपालिका–२, खटहरस्थित आधारभूत स्वास्थ्य केन्द्रमा आयोजना गरेको निःशुल्क आँखा शिविरमा १३६ जनाको आँखा परीक्षण गरिएको छ। परीक्षणका क्रममा थप उपचार तथा शल्यक्रिया आवश्यक देखिएका १९ जनाको निःशुल्क शल्यक्रिया गर्ने व्यवस्था मिलाइएको आयोजकले जनाएको छ।
लायन्स अन्तर्राष्ट्रियको ‘भिजन’ कार्यक्रमअन्तर्गत अक्टोबर ८ देखि १८ सम्म सञ्चालन हुने विभिन्न सेवामूलक गतिविधिमध्ये विश्व दृष्टि दिवसका अवसरमा उक्त शिविर आयोजना गरिएको हो। आँखाको स्वास्थ्यप्रति जनचेतना अभिवृद्धि गर्ने, सर्वसाधारणलाई सहज रूपमा आँखा परीक्षण तथा परामर्श सेवा उपलब्ध गराउने र दृष्टिसम्बन्धी समस्या समयमै पहिचान गरी उपचारमा सहयोग पुर्याउने उद्देश्यले शिविर सञ्चालन गरिएको क्लबले जनाएको छ।
शिविरमा परीक्षण गरिएका १३६ जनामध्ये १९ जनालाई थप उपचार तथा शल्यक्रियाका लागि छनोट गरिएको थियो। उनीहरूको निःशुल्क शल्यक्रियाको व्यवस्था मिलाइएको छ। साथै, आवश्यक औषधि वितरणका लागि लायन्स क्लब अफ बुटवल सेन्ट्रलले करिब २० हजार रुपैयाँ बराबरको औषधि सहयोग गरेको थियो।
लायन्स क्लब अफ बुटवल सेन्ट्रलका अध्यक्ष लायन कृष्णबन्धु अर्यालको अध्यक्षतामा सम्पन्न कार्यक्रममा सुनवल नगरपालिका–२ का वडाध्यक्ष राजेन्द्र यादव प्रमुख अतिथि तथा लायन्स इन्टरनेशनल डिस्ट्रिक्ट ३२५ ‘पी’ नेपालका DAT टिम एड्भाइजर लायन विष्णु कुँवर विशिष्ट अतिथि रहेका थिए।
कार्यक्रममा क्लबका द्वितीय उपाध्यक्ष लायन कृष्णप्रसाद घिमिरेले विश्व दृष्टि दिवसको महत्त्व, नियमित आँखा परीक्षण र दृष्टि सुरक्षाका विषयमा जानकारी गराएका थिए।
शिविरमा वरिष्ठ नेत्र सहायक राधिका यादवले सहभागीहरूको आँखा परीक्षण गर्दै आँखाको स्वास्थ्य, दृष्टिसम्बन्धी समस्या पहिचान तथा समयमै उपचारको आवश्यकताबारे परामर्श प्रदान गरेकी थिइन्।
विशिष्ट अतिथि लायन विष्णु कुँवरले लायन्स अन्तर्राष्ट्रियले अघि सारेका स्वास्थ्य तथा मानवीय सेवामूलक अभियानमा लायन्स क्लबहरूको महत्त्वपूर्ण भूमिका रहेको बताए। उनले समुदायमा प्रत्यक्ष लाभ पुग्ने यस्ता कार्यक्रमलाई निरन्तरता दिनुपर्नेमा जोड दिए।
प्रमुख अतिथि वडाध्यक्ष राजेन्द्र यादवले स्थानीयस्तरमै निःशुल्क आँखा परीक्षण तथा उपचारको व्यवस्था मिलाइनु सराहनीय कार्य भएको बताए। उनले स्वास्थ्य तथा सामाजिक सेवाका क्षेत्रमा लायन्स क्लबले पुर्याउँदै आएको योगदानको प्रशंसा गरे।
क्लब अध्यक्ष लायन कृष्णबन्धु अर्यालले समुदायमा प्रत्यक्ष स्वास्थ्य सेवा पुर्याउने उद्देश्यले शिविर आयोजना गरिएको बताए। उनले आगामी दिनमा पनि स्थानीय आवश्यकता र समुदायको मागअनुसार स्वास्थ्य तथा सामाजिक सेवामूलक कार्यक्रमलाई निरन्तरता दिने प्रतिबद्धता व्यक्त गरे।
कार्यक्रमको सञ्चालन लियो–लायन हिमाल खनालले गरेका थिए। उनले समुदायको सेवामा समर्पित भएर यस्ता कार्यक्रम सञ्चालन गर्न पाउनु लायन्स सदस्यहरूका लागि महत्त्वपूर्ण अवसर भएको बताए।
नियमित आँखा परीक्षणको महत्त्वबारे सचेतना फैलाउनुका साथै उपचार आवश्यक भएका नागरिकलाई थप स्वास्थ्य सेवासँग जोड्न शिविरले सहयोग पुर्याएको आयोजकले जनाएको छ। क्लबले स्वास्थ्य सेवाको पहुँचबाट टाढा रहेका समुदायलाई लक्षित गरी आगामी दिनमा पनि यस्ता अभियान सञ्चालन गर्ने जनाएको छ।
