बुटवल :-स्मार्ट सुरक्षा प्रविधिको बढ्दो मागसँगै नेपाली बजारमा सेवा प्रदान गर्दै आएको जेटकेटेक (ZKTeco) को टेक्निकल वर्कसप रुपन्देहीमा सम्पन्न भएको छ। चीनको उत्कृष्ट प्रविधियुक्त जेटकेटेक उत्पादनको नेपालका लागि आधिकारिक वितरक प्लानेट इन्फोसिस प्रालिको आयोजनामा तथा बुटवल कम्प्युटर प्रालिको संयोजनमा हाेटल पाैवामा वर्कसप आयोजना गरिएको हो।
वर्कसपमा जेटकेटेकका टेक्निकल इन्जिनियर गोथमेन र रचनाले प्रशिक्षण दिँदै क्लाउड–आधारित सुरक्षा प्रविधि, यसको प्रयोग, व्यवस्थापन तथा प्राविधिक पक्षबारे विस्तृत जानकारी गराएका थिए। जेटकेटेक विश्वका धेरै देशहरूमा मल्टिपल सुरक्षा तथा एटेन्डेन्स समाधान उपलब्ध गराउँदै आएको ब्रान्ड हो, जसको आर एण्ड डी सेन्टर भारतमा रहेको छ।
प्रशिक्षक इन्जिनियर रचनाका अनुसार हाल बजारमा १५ भन्दा बढी प्रकारका एटेन्डेन्स मेसिन उपलब्ध छन्, जसमा फेस, फिङ्गर र कार्ड सिस्टम समावेश छन्। तीमध्ये ‘के–४०’ मोडल उपभोक्तामाझ सबैभन्दा बढी रुचाइएको उत्पादनका रूपमा स्थापित भएको उनले बताए।
कार्यक्रममा ग्रिन टेक्निकल प्रालिका सिइओ मनकृष्ण श्रेष्ठले विक्रेता र प्राविधिकको क्षमता अभिवृद्धि गर्ने उद्देश्यले वर्कसप आयोजना गरिएको जानकारी दिए। उनले नयाँ भित्रिएका सफ्टवेयर र प्रविधिबारे अद्यावधिक जानकारी दिन कार्यक्रम केन्द्रित गरिएको बताए।
प्लानेट इन्फोसिस प्रालिका सिइओ सुनिल महर्जनले जेटकेटेक विश्वस्तरमै अग्रणी कम्पनीका रूपमा स्थापित भइसकेको र नेपालमा पनि यसको प्रविधि उपभोक्तामाझ लोकप्रिय बन्दै गएको उल्लेख गरे।
लुम्बिनी प्रदेशका लागि आधिकारिक बिक्रेता बुटवल कम्प्युटर प्रालिका सञ्चालक विष्णु प्रसाद गौतमका अनुसार वर्कसपमा लुम्बिनी प्रदेशका विभिन्न जिल्लाबाट करिब ७० जना विक्रेता तथा प्राविधिकको सहभागिता रहेको थियो। कार्यक्रममा सहभागी बिक्रेता तथा प्राविधिकलाई मायाको चिनोसमेत प्रदान गरिएको थियो।
