काठमाडौं :- सहरको झिलिमिली, भीडभाड र सुविधाबीच बस्दा धेरैले गाउँ बिर्सन्छन्। तर उद्यमी न्याैपानेका लागि गाउँ केवल सम्झना होइन, निरन्तर प्रेरणाको स्रोत हो। सहरमा बसेर पनि उनले गाउँको माटोको गन्ध, त्यहाँका संघर्ष र सपना कहिल्यै मनबाट हट्न दिएनन्। यही भावनाले उनलाई व्यवसाय मात्रै होइन, उद्देश्यसहितको यात्रातर्फ डोर्यायो।
आधुनिक सोच, लगानीप्रतिको आत्मविश्वास र निरन्तर परिश्रमका साथ न्याैपानेले सानो ‘पैचो पसल’बाट आफ्नो उद्यम यात्रा सुरु गरे। ग्राहकलाई चाहिने सामान सहज, गुणस्तरीय र विश्वासयोग्य रूपमा उपलब्ध गराउने लक्ष्य नै उनको व्यवसाय विस्तारको आधार बन्यो। उपभोक्ताको रोजाइ र बजारको मागलाई ध्यानमा राख्दै अघि बढेको यो यात्रा आज ‘पैचो पसल’का रूपमा चिनिन पुगिसकेको छ, जसले सहरका ग्राहकसँगै गाउँबाट आएका उपभोक्ताको पनि विश्वास जित्न सफल भएको छ।
व्यवसाय सञ्चालनका क्रममा उनले स्थानीय पालिकासँग हातेमालो गरेका छन्। पालिकाका प्रमुख कार्यकारी अधिकृतसँग निरन्तर छलफल र सहकार्य गर्दै व्यवसायलाई स्थानीय विकाससँग जोड्ने प्रयास भइरहेको न्याैपाने बताउँछन्। “व्यवसाय नाफाका लागि मात्रै होइन, समाज र स्थानका लागि पनि उपयोगी हुनुपर्छ,” उनी भन्छन्। यही सोचका कारण सामाजिक उत्तरदायित्वलाई उनले व्यवसायको अभिन्न हिस्सा बनाएका छन्।
सहरमा सुविधा भए पनि गाउँको पीडा, बेरोजगारी र अवसरको अभावले न्याैपानेलाई सधैँ झकझक्याइरहन्छ। यही अनुभूतिले उनलाई विदेश होइन, आफ्नै देशमा केही गर्नुपर्छ भन्ने निर्णयमा पुर्यायो। आज देशका विभिन्न स्थानमा सञ्चालनमा रहेका १० वटा शाखाले प्रत्यक्ष तथा अप्रत्यक्ष रूपमा थुप्रै युवालाई रोजगारी दिएको छ।
न्याैपानेका लागि व्यवसाय विस्तार नाफा बढाउने माध्यम मात्र होइन। “यदि गाउँ छोडेर सहर आउन बाध्य भएका युवालाई आफ्नै देशमै अवसर दिन सकियो भने सहरको अनियन्त्रित भीड पनि घट्छ,” उनी भन्छन्।
सानो ‘पैचो पसल’बाट सुरु भएको यो यात्रा आज १० शाखासम्म आइपुग्दा न्याैपानेको कथा केवल एक व्यवसायीको सफलता कथा मात्र रहेन। यो गाउँप्रतिको माया, देशप्रतिको जिम्मेवारी र उद्यमशील साहसको सशक्त उदाहरण बनेको छ। सहरमा बसेर पनि गाउँको सपना देख्ने र त्यसलाई व्यवहारमा उतार्ने उनको यात्रा आज धेरै युवाका लागि आशा र प्रेरणाको स्रोत बनेको छ।
