काठमाडौं :- नेकपा (एमाले) को ११औँ महाधिवेशन नजिकिँदै गर्दा काठमाडौं–४ संगठनात्मक हिसाबले सबैभन्दा सक्रिय र प्रतिस्पर्धात्मक क्षेत्रका रूपमा उभिएको छ। क्षेत्रभित्र चलिरहेका भेटघाट, अभियान, शक्ति–समूह र स्थानीय नेतृत्वको सक्रियताले महाधिवेशन प्रतिनिधि छनोटमा निर्णायक मोड बनाइरहेको छ।विशेषगरी बुढानीलकण्ठमा साथापन समूह उल्लेखनीय रूपमा अगाडि देखिँदै छ, जसको प्रभावले समग्र क्षेत्रको समीकरणलाई प्रभावित बनाइरहेको कार्यकर्ताहरूको मूल्यांकन छ।
जयराम थापाको सक्रियता : संगठन पुनर्संरचनामा निरन्तर पहल
प्रदेशसभा सदस्य जयराम थापा पछिल्लो केही महिनायता बुढानीलकण्ठ क्षेत्रमा वडा–वडा बैठक, घरदैलो, कार्यकर्ता अन्तर्क्रिया र संगठन विस्तार अभियानमार्फत अत्यधिक सक्रिय देखिएका छन्।
थापाको समन्वय र उपस्थितिले साथापन समूहलाई संगठित र एकीकृत रूपमा परिचालित गरिरहेको नेताकार्यकर्ताहरूको धारणा छ।
यही कारण बुढानीलकण्ठ क्षेत्रमा साथापन पक्षको पकड झन् मजबुत बन्दै गएको देखिन्छ।
ईश्वर पेखोल : संगठनभित्रको प्रभावले समीकरण झनै स्पष्ट
काठमाडौँ–४ को राजनीतिक भूगोलमा ईश्वर पेखोल दीर्घकालीन जनाधार र संगठनात्मक प्रभाव बोकेका नेता मानिन्छन्।
वडा–टोल संरचनादेखि स्थानीय अभियानसम्म उनका प्रभावशाली नेटवर्क र मतदातासँगको बलियो सम्बन्धले महाधिवेशन प्रतिनिधि छनोटमा उनको लाइन निर्णायक हुने संकेत बढ्दै गएको छ।कार्यकर्ताहरूको मूल्याङ्कनमा पेखोल निकट संरचना अहिले उल्लेखनीय रूपमा सक्रिय रहेको देखिन्छ।
पूर्वराष्ट्रपति विद्या भण्डारीको आधारक्षेत्र : पुरानो संरचना अझै प्रभावकारी
काठमाडौँ–४ दीर्घकालदेखि पूर्वराष्ट्रपति विद्या भण्डारीको स्थायी राजनीतिक आधारक्षेत्रका रूपमा परिचित छ।उनले निर्माण गरेको संगठनात्मक संरचना, जनसम्पर्क नेटवर्क र स्थानीय पहुँच आज पनि मजबुत मानिन्छ। यही कारण, क्षेत्रको राजनीतिक वजन र महाधिवेशन प्रतिनिधि चयनमा काठमाडौँ–४ को भूमिका सधैं निर्णायक रहने विश्लेषण गरिन्छ।
५ मध्ये ३ प्रतिनिधि साथापनसम्बद्ध हुने सम्भावना बलियो
विभिन्न वडा प्रतिवेदन, कार्यकर्ता भेटघाट र हालको राजनीतिक सक्रियताको मूल्याङ्कन गर्दा
महाधिवेशनका लागि काठमाडौँ–४ बाट चयन हुने ५ प्रतिनिधिमध्ये कम्तीमा ३ जना साथापन समूहबाट हुने प्रबल संकेत देखिएको छ।
यसले बुढानीलकण्ठ मात्र होइन, समग्र काठमाडौँ–४ मा साथापन पक्षको उचाइ र प्रभाव झनै पुष्टि भएको बताइन्छ।
संगठनभित्र उत्साह, नेतृत्वमा अपेक्षाको वृद्धि
महाधिवेशन प्रतिनिधि छनोट निकटिँदै जाँदा स्थानीय नेताहरूको बढ्दो उपस्थिती, अभियानगत सक्रियता, कार्यकर्ता परिचालनले संगठनभित्र उत्साहात्मक वातावरण बनाएको छ।
भित्रभित्रै शक्ति–सन्तुलन र भावी नेतृत्वको संकेत खोजिरहेका कार्यकर्ताहरूले यो महाधिवेशन काठमाडौँ–४ को राजनीतिक मानचित्रमा महत्वपूर्ण मोड बन्ने अपेक्षा व्यक्त गरिरहेका छन्।
