बुटवल :-‘सेवा नै सबैभन्दा ठूलो धर्म हो’ भन्ने भावनासहित पहिलो पाइला नेपाल, बुटवल शाखाले शिक्षा, स्वास्थ्य र सहयोगका तीन महत्वपूर्ण सामाजिक अभियान सम्पन्न गरेको छ।
कर्णाली प्रदेशको सुर्खेतस्थित बादी सरोकार मञ्च, वीरेन्द्रनगर–८ मा आयोजित ती कार्यक्रमहरूले पछाडि परेका बादी समुदायमा आशा, आत्मविश्वास र सामाजिक सहभागिता जगाएको स्थानीय अगुवाहरूले बताएका छन्।
अभियन्ता तुलसीराम खनालका अनुसार एकैदिन सञ्चालन गरिएका ती तीन कार्यक्रमहरूले मानवीय सेवाको प्रेरणादायी उदाहरण प्रस्तुत गरेका हुन्।
‘भाग्य बोक्ने झोला’ वितरण
‘शिक्षा नै भविष्यको ढोका हो’ भन्ने सन्देशसहित संस्थाले ११० जना बादी बालबालिकालाई शैक्षिक सामग्रीसहितको झोला वितरण गरेको हो।
झोलामा कपी, कलम, पेन्सिल, इरेजर, कटर, कलर, ज्यामिती बक्स, पानीको बोतल, टिफिन बक्स र रुमाल समावेश गरिएको थियो।
कार्यक्रमका संयोजक तथा संस्थाका द्वितीय उपाध्यक्ष मनिष खनालले जानकारी दिए अनुसार, झोला वितरणले बालबालिकामा अध्ययनप्रतिको उत्साह बढाएको छ।
यस कार्यक्रममा सोमनाथ खनाल सदस्यका रूपमा संलग्न थिए।
निःशुल्क आँखा शिविर र औषधि वितरण
स्वास्थ्य सेवा पहुँचविहीन क्षेत्रका नागरिकका लागि शाखाले निःशुल्क आँखा शिविर सञ्चालन गरेको थियो।
शाखाका सदस्य तथा चिकित्सक डा. सन्तोष क्षेत्रीले प्रत्यक्ष रूपमा जाँच तथा उपचार सेवा प्रदान गरे।
शिविरमा सहभागीहरूलाई निःशुल्क औषधि र चश्मा वितरण गरिएको थियो।
शिविरका संयोजक तथा सह–सचिव प्रकाश पोखरेलका अनुसार, सेवाबाट लाभान्वित भएकाहरू अत्यन्त खुसी थिए।
खाद्यान्न सहयोग कार्यक्रम
खाद्य सुरक्षाको सन्देशसहित शाखाले समुदायका विपन्न परिवारलाई १० बोरा चामल, २ बोरा दाल र २ कार्टुन तेल वितरण गरेको थियो।
यो कार्यक्रमका संयोजक सदस्य नविन पोखरेलले सहकार्यका लागि सम्पूर्ण सहयोगीहरूलाई धन्यवाद दिएका छन्।
️ कार्यक्रमको संचालन र मन्तव्य
कार्यक्रमको अध्यक्षता गोमा भट्टराईले गरेकी थिइन् भने प्रमुख अतिथि वरिष्ठ नशा तथा मानसिक रोग विशेषज्ञ डा. सुषिल समदर्शी रहेका थिए।
कार्यक्रमको सहजीकरण र सञ्चालन सचिव रुद्र खनालले गरेका थिए।
संस्थाकी अध्यक्ष गोमा भट्टराईले भनिन् – “शिक्षा, स्वास्थ्य र मानवता — यी तीन आधारमा समाज रुपान्तरणको हाम्रो यात्रा अघि बढ्दैछ। पहिलो पाइला नेपाल देशभर सहयोगका कदम विस्तार गर्दैछ।”
कार्यक्रममा प्रथम उपाध्यक्ष गौरव खनाल (स्वागत मन्तव्य), केन्द्रीय सदस्य राजन अधिकारी, समाजसेवी रत्नलाल न्यौपाने, बादी सरोकार मञ्च नेपालका सञ्चालक हिक्मत बादी र सल्लाहकार गङ्गाधर न्यौपानेले कार्यक्रमको सफलता र निरन्तरताको शुभकामना व्यक्त गरेका थिए।
