चितवन । लक्की फिल्मी अवार्ड – २०८० को तयारी तीब्र बनेको छ । लक्की मिडिया हाउसले असोज पहिलो साता हुने अवार्ड कार्यक्रमका लागि कलाकारसँग अन्तर्क्रिया, भेटघाटका गतिविधि हुँदै आएका छन् ।
झण्डै २ दर्जन कलाकारलाई विभिन्न विधामा अवार्ड दिने तयारी भैरहेको छ । अवार्ड वितरण कार्यक्रममा समाजमा उत्कृष्ट प्रशंसनीय काम गरेका व्यक्तिहरुलाई समेत सम्मान गरिने लक्की मिडिया हाउसका महा – प्रबन्धक हरि कार्की ‘ लक्की ’ ले बताए ।
मोफसलमा रहेर पनि सक्रिय पत्रकारिता गरेका पत्रकार, स्वास्थ क्षेत्रमा योगदान पुर्याएका चिकित्सक, शिक्षा क्षेत्रमा योगदान गरेका शिक्षकहरुलाई पनि सम्मान गरिने बताए । यस्तै, चितवनको खेल जगतमा योगदान गरेका खेलाडी, उद्यमशिलता – रोजगारी प्रवर्द्धन गर्न योगदान गरेका व्यवसायीलाई सम्मान गरिने छ ।
महा – प्रबन्धक कार्कीले सिने क्षेत्रलाई स्वस्थ प्रतिस्पर्धाको वातावरण बनाउन गुणस्तरीय सिनेमा निर्माणका लागि अवार्ड कार्यक्रमले सघाउने बताए । कलाकारको योगदानको कदर गर्नेु पर्नेमा जोड दिए । अवार्ड वितरणका लागि नोमिनेसनको काम हुन थालेको छ । अवार्ड छनौटका लागि जूरी टिमले कार्य विधि बनाएर काम गर्न थालेको उनले बताए ।
हल सञ्चालक सम्मान, चलचित्र वितरक सम्मान, समाजसेवी सम्मान जस्ता कार्यक्रमहरु पनि हुने कार्कीले बताए । वि.सं. २०७१ सालमा स्थापना भएको लक्की मिडिया हाउसले चितवनबाट सिनेमा बजारको प्रचार, प्रर्वद्धनका काम तथा इभेन्टसहरु गर्दै आइरहेको छ ।
