काठमाडौं। प्रधानमन्त्री बालेन शाहले प्रत्येक नागरिकको जीउधनको सुरक्षा, सामाजिक सद्भावको संरक्षण र देशमा शान्ति कायम गर्नु राज्यको सर्वोच्च प्राथमिकता भएको बताउनुभएको छ।
राष्ट्रका नाममा सम्बोधन गर्दै प्रधानमन्त्री शाहले सरकारले आगामी दिनमा पनि थप सतर्क र संवेदनशील भएर काम गर्ने प्रतिबद्धता व्यक्त गर्नुभयो। उहाँले प्रत्येक नागरिकको जीवन सुरक्षाका लागि सरकारका सम्पूर्ण संयन्त्रहरू अहोरात्र परिचालित रहने बताउनुभयो।
प्रधानमन्त्री शाहले शान्ति–सुरक्षा भंग गर्ने, अराजकता फैलाउने तथा नेपालको सदियौँ पुरानो सामाजिक सद्भाव, धार्मिक सहिष्णुता र भाइचारालाई खलबल्याउने कुनै पनि गतिविधिप्रति सरकार पूर्ण रूपमा सचेत रहेको उल्लेख गर्नुभयो।
उहाँले यस्ता गतिविधिमा संलग्न जो–कोहीमाथि कानुनबमोजिम कडा कारबाही गरिने स्पष्ट पार्दै सबै नागरिकलाई संयमता अपनाउन, अफवाहमा विश्वास नगर्न तथा सामाजिक सद्भाव कायम राख्न सहयोग गर्न आग्रह गर्नुभयो।
