काठमाडौं :- श्रम, रोजगार तथा सामाजिक सुरक्षा मन्त्रालयले विभिन्न स्वास्थ्य संस्था तथा प्रतिष्ठानहरूमा श्रम ऐन विपरीत काम गराइएको भन्ने गुनासोप्रति ध्यानाकर्षण भएको जनाएको छ।
मन्त्रालयका अनुसार केही अस्पताल तथा स्वास्थ्य संस्थाहरूमा चिकित्सक, स्वास्थ्यकर्मी, नर्सिङ स्टाफ लगायतलाई नियमअनुसार श्रम सम्झौता नगरी काममा लगाइएको तथा तोकिएको समयभन्दा बढी समय काम गराइएको भन्ने उजुरी प्राप्त भएको छ। साथै, प्रशिक्षार्थी (इण्टर्न/ट्रेनिज) बाट पनि यस्तै गुनासा आएको मन्त्रालयले जनाएको छ।
श्रम, रोजगार तथा सामाजिक सुरक्षा मन्त्रालय ले सबै रोजगारदाता र श्रमिकबीच अनिवार्य रूपमा रोजगार सम्झौता गर्न निर्देशन दिएको छ।
मन्त्रालयले श्रम ऐन, २०७४ अनुसार दैनिक ८ घण्टा र साप्ताहिक ४८ घण्टाभन्दा बढी काम गराउन नपाइने स्पष्ट व्यवस्था रहेको स्मरण गराउँदै आवश्यक परे सीमित अतिरिक्त समय मात्र काम गराउन सकिने जनाएको छ।
मन्त्रालयले सबै स्वास्थ्य संस्था तथा रोजगारदातालाई प्रचलित कानूनको पूर्ण पालना गर्न आग्रह गर्दै नियमविपरीत कार्य भएको पाइएमा कारबाही हुने चेतावनी समेत दिएको छ।
