बुटवल :- आसन्न प्रतिनिधि सभा सदस्य निर्वाचनमा रुपन्देही क्षेत्र नं. २ का नेपाली काँग्रेस प्रत्यक्ष उम्मेदवार चुन्नप्रसाद शर्मा पौडेललाई उद्योगी–व्यवसायीहरूले मत दिन आग्रह गरेका छन्। काँग्रेसको उद्योगी–व्यवसायी परिचालन उपसमितिका संयोजक हरिप्रसाद अर्यालद्वारा जारी विज्ञप्तिमा निर्वाचनलाई व्यक्तिगत प्रतिष्ठाभन्दा देशको रुपान्तरणको अवसरका रूपमा लिनुपर्ने उल्लेख गरिएको छ।
विज्ञप्तिमा प्रत्यक्ष र समानुपातिक दुवै मतपत्रमा रुख चिन्हमा मतदान गरी काँग्रेसका उम्मेदवारलाई विजयी गराउन अपिल गरिएको छ। “राजनीति आय–आर्जनको माध्यम होइन, जनसेवाको अवसर हो,” विज्ञप्तिमा भनिएको छ।
उम्मेदवार पौडेलले उद्योग–व्यवसाय र समग्र विकाससँग सम्बन्धित प्रतिबद्धताहरू अघि सारेका छन्। उनले कर तथा राजश्व कानुन सुधार गरी आयकर छुट सीमा १० लाख रुपैयाँसम्म पु¥याउने, विभिन्न कर एकीकृत गर्ने र भिसिटिएस तथा ई–बिलिङ प्रणाली एउटै सफ्टवेयरमा समेट्ने योजना प्रस्तुत गरेका छन्।
यस्तै, सार्वजनिक खरिद ऐन संशोधन गरी निर्माण र खरिद प्रक्रिया सरल र पारदर्शी बनाउने, बुटवल तथा मोतिपुर औद्योगिक क्षेत्र विस्तार गर्ने, स्वास्थ्य क्षेत्रमा लुम्बिनी प्रादेशिक अस्पतालको सेवा सुधार गर्ने र बुटवल मेडिकल कलेज सञ्चालनमा ल्याउने प्रतिबद्धता जनाएका छन्। कृषि आधुनिकीकरण, युवालाई सीपमूलक तालिम, रोजगारी सिर्जना, भूमिहीन व्यवस्थापन, चुरे संरक्षण, नदी तटबन्ध, सडक तथा खेल पूर्वाधार विकास, प्राविधिक शिक्षा र झुम्सा खानेपानी आयोजना पनि उनको एजेन्डामा रहेका छन्।
विज्ञप्तिमा भनिएको छ कि पौडेल जनतासँग नजिक रहँदै कानुन निर्माण र विकासका एजेन्डा कार्यान्वयनलाई प्राथमिकता दिने नेतृत्वका रूपमा प्रस्तुत छन्। उद्योगी–व्यवसायी परिचालन उपसमितिले सम्पूर्ण समुदायलाई सक्रिय सहभागिताका साथ मतदान गर्न आग्रह गरेको छ।
