गुल्मी :- सामाजिक सेवामा सक्रिय नामका रूपमा परिचित श्रद्धा कुवर अहिले राजनीतिक यात्राको नयाँ मोडमा उभिएकी छन्। क्लबमार्फत सुरु भएको उनको सामाजिक अभियान अब प्रतिनिधित्वको राजनीतिक यात्रासँग जोडिएको छ। उनी गुल्मी–२ बाट राष्ट्रिय स्वतन्त्र पार्टीकी महिला समानुपातिक उम्मेदवारका रूपमा अघि बढेकी छन्।
विगत केही वर्षदेखि विभिन्न सामाजिक क्लब तथा संस्थामार्फत महिला सशक्तीकरण, विपन्न परिवार सहयोग, शैक्षिक सामग्री वितरण, स्वास्थ्य सचेतना कार्यक्रम तथा सीप विकास तालिम सञ्चालन गर्दै आएकी कुवरले गाउँ–गाउँमा आफ्नो छुट्टै पहिचान बनाएकी छन्। स्थानीय महिलाहरूका बीच नेतृत्व विकास र आत्मनिर्भरता सम्बन्धी कार्यक्रम सञ्चालन गरेर उनले धेरैलाई प्रेरित गरेकी बताइन्छ।
कुवर भन्छिन्, “समाजमा काम गर्दा महिलाका पीडा, युवाका बेरोजगारीका समस्या र ज्येष्ठ नागरिकका गुनासा नजिकबाट देखेँ। अब ती विषय नीति निर्माण तहमा उठाउन चाहन्छु।”
उनको उम्मेदवारीले गुल्मी–२ मा महिला सहभागिता र समावेशी प्रतिनिधित्वको बहसलाई थप बल दिएको छ। स्थानीय बासिन्दाहरूका अनुसार सामाजिक क्षेत्रमा सक्रिय व्यक्तित्व राजनीतिमा प्रवेश गर्दा जनताको वास्तविक आवाज सशक्त रूपमा प्रस्तुत हुने अपेक्षा गरिएको छ।
गुल्मी–२ मा महिला समानुपातिक उम्मेदवारका रूपमा श्रद्धा कुवरको अग्रसरता केवल राजनीतिक कदम मात्र नभई सामाजिक यात्राको निरन्तरता भएको विश्लेषण गरिएको छ। अब उनको सामाजिक विश्वासलाई राजनीतिक समर्थनमा रूपान्तरण गर्ने जिम्मा भने मतदाताकै हातमा रहनेछ।
