काठमाडौं :-नेकपा (एमाले)का उपमहासचिव तथा पूर्वपरराष्ट्रमन्त्री प्रदीप ज्ञवालीले प्रधानमन्त्रीको हालैको अभिव्यक्तिप्रति आपत्ति जनाउँदै उक्त भनाइ तत्काल फिर्ता लिन र सार्वजनिक रूपमा क्षमा माग्न माग गरेका छन्।
सामाजिक सञ्जाल फेसबुकमार्फत प्रतिक्रिया दिँदै ज्ञवालीले संसदमा प्रधानमन्त्रीले “नेपालले पनि भारतको जग्गा धेरै ठाउँमा मिचेको छ” भन्ने आशय व्यक्त गरेको भन्दै त्यसलाई आपत्तिजनक, सन्देहास्पद र भर्त्सनायोग्य भएको बताएका हुन्।
उनले राष्ट्रिय हित, सार्वभौमिकता र सीमासम्बन्धी विषय अत्यन्त संवेदनशील भएकाले यस्ता अभिव्यक्तिले गम्भीर प्रश्न उठाउने उल्लेख गरेका छन्।
ज्ञवालीले प्रधानमन्त्रीले आफ्नो भनाइ तत्काल फिर्ता लिएर सार्वजनिक रूपमा क्षमा माग्नुपर्ने तथा अभिव्यक्तिबारे स्पष्ट धारणा राख्नुपर्ने माग गरेका छन्।
प्रधानमन्त्रीको उक्त भनाइ सार्वजनिक भएपछि राजनीतिक वृत्तमा विभिन्न प्रतिक्रिया आउन थालेका छन्। विपक्षी दलका नेताहरूले समेत यस विषयमा सरकारको धारणा स्पष्ट हुनुपर्ने बताएका छन्।
