बुटवल :- नेपाली कांग्रेसका महासमिति सदस्य तथा रुपन्देही निर्वाचन क्षेत्र नम्बर–२ का उम्मेदवार चुन्न प्रसाद शर्मा पौडेलले बुटवलको समग्र विकास, आर्थिक चलायमानता र युवामुखी अवसर सिर्जनाका लागि आफू उम्मेदवार बनेको स्पष्ट पार्नुभएको छ।
लामो समयदेखि सामाजिक सेवामा सक्रिय रहँदै आएका पौडेललाई स्थानीयवासीले ‘युवाको ढुकढुकी’का रूपमा चिन्ने गरेका छन्। सहनशील, सरल र सबै वर्गसँग सहज रूपमा घुलमिल हुने व्यक्तित्वका रूपमा परिचित पौडेल बुटवलको सामाजिक पहिचानसँग जोडिएको नामका रूपमा स्थापित हुनुभएको छ।
पौडेलले रोजगारी सिर्जना, उद्यमशीलता प्रवर्द्धन र स्थानीय अर्थतन्त्र सुदृढीकरणलाई आफ्नो प्रमुख एजेन्डा बनाउँदै आउनुभएको छ।
बुटवलको औद्योगिक, व्यापारिक तथा सेवा क्षेत्रलाई थप चलायमान बनाउन ठोस योजना अघि सारिएको उल्लेख गर्दै उहाँले पूर्वाधार विकास, सडक विस्तार, खानेपानी, शिक्षा र स्वास्थ्य क्षेत्रमा गुणस्तरीय सुधार अपरिहार्य रहेको बताउनुभयो।
“विकास केवल संरचना निर्माणमा सीमित हुनु हुँदैन, यसले नागरिकको जीवनस्तर उकास्नुपर्छ,” पौडेलले भन्नुभयो।
युवालाई अवसर दिन सके मात्र समाज अघि बढ्ने विश्वास व्यक्त गर्दै उहाँले सीपमूलक तालिम, स्टार्टअप प्रवर्द्धन, स्वरोजगार कार्यक्रम र स्थानीय उत्पादनको बजारीकरणमा विशेष जोड दिने प्रतिबद्धता जनाउनुभयो। सामाजिक सद्भाव, सहकार्य र समावेशी विकास नै बुटवलको दिगो भविष्य भएको उहाँको धारणा छ।
स्थानीय तहदेखि संघीय तहसम्म प्रभावकारी समन्वय गर्दै दीर्घकालीन विकास योजनाहरू कार्यान्वयन गर्ने प्रतिबद्धता व्यक्त गर्दै पौडेलले जनताको साथ र भरोसाले मात्र बुटवललाई समृद्ध, व्यवस्थित र अवसरयुक्त शहरका रूपमा स्थापित गर्न सकिने बताउनुभयो।
