बुटवल :- पहिलो पाइला नेपाल बुटवल शाखाको आयोजनामा भएको स्लो बाइक रेस प्रतियोगितामा विनोद कालिराज प्रथम भएका छन्। बुटवलको देविनगरस्थित लुम्बिनी वाणिज्य क्याम्पसको खेल मैदानमा आयोजित प्रतियोगितामा ७० जना प्रतिस्पर्धीलाई पछि पार्दै कालिराजले पहिलो स्थान हासिल गरेका हुन्।
प्रतियोगितामा राजन गहतराज दोस्रो र मनोज आचार्य तेस्रो भएका छन्। प्रथम, द्वितीय र तृतीय हुने प्रतियोगीले क्रमशः नगद ११ हजार १११, ८ हजार १११ र ४ हजार १११ रुपैयाँसहित पुरस्कार प्राप्त गरेका छन्।
विजयी प्रतियोगीलाई पहिलो पाइला नेपाल बुटवल शाखाकी अध्यक्ष गोमा भट्टराई र इलाका प्रहरी कार्यालय बुटवलका प्रहरी उपरीक्षक इन्द्रबहादुर रानाले संयुक्त रूपमा पुरस्कार प्रदान गरेका थिए। सो अवसरमा बोल्दै प्रमुख अतिथि प्रहरी उपरीक्षक रानाले सवारी साधन चलाउँदा ट्राफिक नियमको पालना गरे अधिकांश दुर्घटनाबाट बच्न सकिने बताए।
पहिलो पाइला नेपाल बुटवल शाखाकी अध्यक्ष गोमा भट्टराईले ट्राफिक सचेतना अभिवृद्धि गर्नुका साथै युवाहरूलाई सकारात्मक रचनात्मक गतिविधिमा एकीकृत गर्ने उद्देश्यले स्लो बाइक रेस आयोजना गरिएको बताइन्। उनले संस्थाले सामाजिक उत्तरदायित्व बहन गर्दै समय–समयमा यस्ता रचनात्मक तथा सामाजिक कार्यक्रम सञ्चालन गर्दै आएको जानकारी दिइन्।
कार्यक्रमका संयोजक सन्तोष सुनारले आगामी वर्षहरूमा पनि युवाहरूलाई लक्षित गर्दै नयाँ–नयाँ कार्यक्रम ल्याइने प्रतिबद्धता जनाए। कार्यक्रम पहिलो पाइला नेपाल बुटवल शाखाका उपाध्यक्ष गौरव खनालको स्वागत मन्तव्य तथा सचिव रुद्रप्रसाद खनालको सञ्चालनमा सम्पन्न भएको थियो।
