रुपन्देही :-सामाजिक अभियान तथा स्वास्थ्य क्षेत्रमा सक्रिय मुक्तिराज पौडेलले नेपाली कांग्रेसको १५औँ महाधिवेशनअन्तर्गत रुपन्देही क्षेत्र नं. २ बाट केन्द्रीय महाधिवेशन प्रतिनिधि पदमा उम्मेदवारी दिएका छन्।
विद्यार्थी राजनीतिबाट राजनीतिक यात्रा सुरु गरेका पौडेलले नेपाल विद्यार्थी संघ (नेविसंघ)मा लामो समय काम गर्दै केन्द्रीय उपसभापतिसम्मको जिम्मेवारी सम्हालेको बताएका छन्। विद्यार्थी राजनीतिबाट प्राप्त संगठनात्मक अनुभवसँगै पछिल्लो समय सामाजिक तथा स्वास्थ्य क्षेत्रका अभियानमा आफूलाई केन्द्रित गर्दै आएको उनको भनाइ छ।
पौडेल विशेषगरी स्वास्थ्य सेवासँग जोडिएका सामाजिक अभियानमा सक्रिय रहँदै आएका छन्। अस्पतालमा बिरामी भेट्न जाँदा परम्परागत रूपमा फलफूल, जुस तथा अन्य खानेकुरा लैजाने अभ्यासको सट्टा बिरामीको उपचार खर्चमै सहयोग पुग्ने गरी नगद प्रदान गर्ने ‘नगदी स्वास्थ्य लाभ कार्ड’ अभियान उनको अगुवाइमा बुटवलबाट सुरु गरिएको थियो।
उक्त अभियानले बिरामीलाई तत्काल आवश्यक पर्ने उपचार खर्चमा सानो भए पनि प्रत्यक्ष सहयोग पुर्याउने उद्देश्य राखेको पौडेलले बताएका छन्। उनको यो अभियानबारे यसअघि विभिन्न सञ्चारमाध्यमले समेत समाचार प्रकाशित गरेका छन्।
राजनीतिक संगठनमा हासिल गरेको अनुभव, स्वास्थ्य क्षेत्रको व्यावहारिक ज्ञान र सामाजिक अभियानबाट प्राप्त अनुभवलाई पार्टी संगठन तथा जनसरोकारका विषयसँग जोड्ने उद्देश्यले आफू महाधिवेशन प्रतिनिधिमा अघि बढेको पौडेलले बताएका छन्।
उनले पार्टी संगठन र नागरिकका दैनिक समस्याबीचको दूरी कम गर्नुपर्ने तथा स्वास्थ्य, सामाजिक सुरक्षा र जनजीविकासँग प्रत्यक्ष जोडिएका विषयलाई राजनीतिक बहस र नीति निर्माणमा प्राथमिकता दिनुपर्ने धारणा राखेका छन्।
विद्यार्थी राजनीतिबाट आएको संगठनात्मक अनुभव र पछिल्लो समय सामाजिक तथा स्वास्थ्य क्षेत्रमा गरेको कामलाई पार्टीको जिम्मेवारीसँग जोड्ने आफ्नो योजना रहेको पौडेलको भनाइ छ।
रुपन्देही क्षेत्र नं. २ बाट महाधिवेशन प्रतिनिधिमा उम्मेदवारी दिएसँगै पौडेलले क्षेत्रीय प्रतिनिधि तथा पार्टीका सदस्यसँग भेटघाट र संवादलाई अघि बढाएका छन्। उक्त क्षेत्रबाट महाधिवेशन प्रतिनिधिका लागि अन्य आकांक्षीहरू पनि मैदानमा रहेकाले अन्तिम प्रतिस्पर्धाको स्वरूप निर्वाचन प्रक्रियासँगै स्पष्ट हुनेछ।
