काठमाडौं :-प्रतिनिधिसभा सदस्य निर्वाचनको ‘इपिसेन्टर’ बनेको झापा क्षेत्र नम्बर–५ बाट राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) ठूलो मतान्तरसहित विजयी भएका छन्।
रास्वपाले शाहलाई प्रधानमन्त्रीको उम्मेदवार घोषणा गरेपछि झापा–५ को निर्वाचन देशभरको चासोको केन्द्र बनेको थियो। काठमाडौं महानगरपालिकाका पूर्वनगरप्रमुख समेत रहेका शाह नेकपा (एमाले) का अध्यक्ष केपी शर्मा ओलीसँग चुनावी प्रतिस्पर्धामा थिए।
अन्तिम मतपरिणाम अनुसार शाहले ६८ हजार ३४८ मत प्राप्त गरेका छन् भने ओली १८ हजार ७३४ मतमै सीमित भएका छन्। शाहले ओलीलाई ४९ हजार ६१४ मतान्तरले पराजित गरेका हुन्।
२०७९ को प्रतिनिधिसभा निर्वाचनमा भने ओलीले नेपाली कांग्रेसका खगेन्द्र पाण्डव अधिकारीलाई २८ हजार ५७६ मतान्तरले पराजित गर्दै विजयी भएका थिए। त्यतिबेला ओलीले ५२ हजार ३१९ मत पाउँदा अधिकारीले २३ हजार ७४३ मत प्राप्त गरेका थिए।
यसपटक भने झापा–५ मा मतदाताले नयाँ राजनीतिक सन्देश दिँदै बालेन शाहलाई भारी मतान्तरसहित विजयी गराएका छन्।
