सिरहा। सिरहाको गोलबजारमा बिहीबार भएको प्रदर्शनका क्रममा ज्यान गुमाएका १५ वर्षीय गणेश यादवको शव दिनभर सडकमा राखेर आफन्त तथा स्थानीयले प्रदर्शन गरेका छन्। साँझ सुरक्षाकर्मीको उपस्थितिमा प्रहरीले शव उठाएर पोस्टमार्टमका लागि पठाएको हो।
औरही गाउँपालिकाका अन्दाजी १५ वर्षीय गणेश यादव प्रदर्शनका क्रममा लागेको गोलीबाट गम्भीर घाइते भएका थिए। उपचारका क्रममा उनको मृत्यु भएपछि आक्रोशित आफन्तले शव सडकमै राखेर घटनाको विरोध गर्दै प्रदर्शन जारी राखेका थिए।
दिनभर प्रदर्शनका कारण गोलबजार क्षेत्र तनावग्रस्त बनेको थियो। अवस्था नियन्त्रणमा लिन नेपाल प्रहरी र सशस्त्र प्रहरीको बाक्लो परिचालन गरिएको थियो। साँझ प्रहरीले सुरक्षा व्यवस्थाका बीच शवलाई एम्बुलेन्समार्फत घटनास्थलबाट उठाएको भए पनि स्थानीयको विरोध प्रदर्शन भने पूर्ण रूपमा रोकिएको छैन।
घटनापछि क्षेत्रमा सुरक्षा सतर्कता बढाइएको छ भने घटनाबारे थप अनुसन्धान भइरहेको प्रहरीले जनाएको छ।
