बुटवल :- सिटी एक्सप्रेसद्वारा प्रस्तुत तथा एक्सपोर्ट एजुकेसनको प्रवर्द्धनमा सञ्चालित डीसीसी प्रिमियर लिग सिजन–२ अन्तर्गत शुक्रबार सम्पन्न खेलमा प्रिन्ट हब किङ्सले एसजीए माभेरिक्सलाई ८ विकेटले पराजित गर्दै प्लेअफमा स्थान सुरक्षित गर्ने पहिलो टोली बनेको छ।
टस जितेर पहिले फिल्डिङ रोजेको प्रिन्ट हब किङ्सले एसजीए माभेरिक्सलाई निर्धारित १५ ओभरमा ९ विकेट गुमाउँदै ११८ रनमा सीमित गरेको थियो। एसजीए माभेरिक्सका लागि प्रकाश पोखरेलले ३७ बलमा ६१ रनको उत्कृष्ट अर्धशतकीय इनिङ खेले पनि टोलीलाई ठूलो योगफलतर्फ लैजान सकेनन्।
प्रिन्ट हब किङ्सका तर्फबाट गणेश पाण्डेयले ३ विकेट लिए भने बिपिन भट्टराईले २ विकेट हात पार्दै विपक्षी टोलीलाई दबाबमा राखेका थिए।
११९ रनको लक्ष्य पछ्याएको प्रिन्ट हब किङ्सले आक्रामक ब्याटिङ प्रदर्शन गर्दै मात्र ८.३ ओभरमा २ विकेट गुमाएर लक्ष्य पूरा गर्यो।
टोलीका लागि निशान टन्डनले २२ बलमा ६१ रनको विस्फोटक इनिङ खेले भने बिपिन भट्टराईले २५ बलमा अविजित ४९ रन बनाउँदै टोलीलाई सहज जित दिलाए।
बलिङ र ब्याटिङ दुवैमा उत्कृष्ट प्रदर्शन गरेका बिपिन भट्टराई खेलको ‘उत्कृष्ट खेलाडी’ घोषित भए।
यस जितसँगै प्रिन्ट हब किङ्स डीसीसी प्रिमियर लिग सिजन–२ को प्लेअफमा स्थान सुरक्षित गर्ने पहिलो टोली बनेको छ। टोलीले हालसम्म खेलेका सात खेलमध्ये पाँच खेलमा जित, एक खेल बराबरी र एक खेलमा हार व्यहोर्दै ११ अंक जोडेको छ। यससँगै प्रिन्ट हब किङ्सले अंक तालिकामा आफ्नो पकड थप मजबुत बनाएको छ।
