धनगढी :- नाला किनारमा नवजात शिशु फालिएको घटनामा संलग्न महिलालाई प्रहरीले पक्राउ गरेको छ। कैलालीको धनगढी उपमहानगरपालिका–८ भद्रटोल क्षेत्रमा नाला किनारमा नवजात शिशु फेला परेपछि प्रहरीले अनुसन्धान अघि बढाउँदै ती महिलालाई नियन्त्रणमा लिएको हो।
जिल्ला प्रहरी कार्यालय कैलालीका सह–प्रवक्ता प्रहरी निरीक्षक कैलाशसिंह बिष्टका अनुसार पक्राउ पर्ने महिला ३० वर्षीया विवाहित हुन्। उनलाई नियन्त्रणमा लिएर थुनामा राखिएको प्रहरीको भनाइ छ।
“महिलाले हिजो मात्रै उक्त शिशु (छोरी) जन्माएको बताउनुभएको छ,” प्रहरी निरीक्षक बिष्टले भने, “उहाँको स्वास्थ्य अवस्था सामान्य नभएकाले हाल विस्तृत सोधपुछ गर्न सकिएको छैन।”
प्रहरीका अनुसार ती महिलाका श्रीमान् रोजगारीको सिलसिलामा विदेशमा छन्। आज बिहान स्थानीयले नाला किनारमा नवजात शिशु फेला पारेपछि प्रहरीलाई खबर गरेका थिए।
उद्धार गरिएकी शिशुलाई उपचारका लागि सेती प्रादेशिक अस्पताल लगिएको छ। प्रहरीका अनुसार शिशुको स्वास्थ्य अवस्था हाल सामान्य रहेको छ।घटनाबारे थप अनुसन्धान भइरहेको प्रहरीले जनाएको छ।
