बुटवल :- बुटवलको शैक्षिक इतिहाससँग अभिन्न रूपमा जोडिएको कान्ति माध्यमिक विद्यालय आज गुणस्तरीय शिक्षाको पर्याय बनेको छ। करिब सात दशक लामो यात्रामा विद्यालयले हजारौँ विद्यार्थीको भविष्य निर्माण गर्दै सामुदायिक विद्यालयप्रतिको धारणा बदल्न सफल भएको छ।
वि.सं. २००८ सालमा पुरानो बुटवलमा स्थापना भएको गणेश विद्या भवन प्राइमरी स्कुल र खस्यौलीमा सञ्चालनमा रहेको जनता विद्या भवन प्राइमरी स्कुललाई एकीकृत गर्दै वि.सं. २०१० साल पुस २ गते विद्यालयको औपचारिक यात्रा सुरु भएको थियो। समयक्रमसँगै विभिन्न नाम परिवर्तन हुँदै आएको विद्यालय हाल कान्ति माध्यमिक विद्यालयका रूपमा स्थापित छ।
विद्यालयले २०६४ सालदेखि कक्षा ११ र १२ सञ्चालन गर्दै आएको छ भने विज्ञान, व्यवस्थापन र शिक्षा संकायमा अध्यापन गराउँदै आएको छ। नियमित शिक्षाबाट बाहिरिएका विद्यार्थीलाई अवसर दिन खुला विद्यालयतर्फ कक्षा ८ र १० समेत सञ्चालन गरिएको छ। संस्कार र संस्कृति संरक्षणका लागि हालैदेखि संस्कृत विषयको अध्यापनसमेत सुरु गरिएको छ।
कान्ति मावि अहिले प्रविधिमैत्री शिक्षण प्रणाली अपनाउने अग्रणी सामुदायिक विद्यालय बनेको छ। स्मार्ट बोर्ड, डिजिटल अभिलेख व्यवस्थापन, कम्प्युटर सफ्टवेयरमार्फत प्रशासनिक काम, हाईस्पिड इन्टरनेटसहितको कम्प्युटर ल्याब र आधुनिक विज्ञान प्रयोगशालाले विद्यालयलाई थप व्यवस्थित बनाएको छ।
हाल विद्यालयमा ५ हजार ८०४ विद्यार्थी अध्ययनरत छन् भने २३५ जना शिक्षक–कर्मचारी कार्यरत छन्। विद्यालयले १८ वटा बसमार्फत टाढाटाढाका विद्यार्थीलाई सहज यातायात सुविधा उपलब्ध गराउँदै आएको छ।
विद्यालयले अन्तर्राष्ट्रिय गुणस्तर प्रमाणपत्र (आईएसओ) प्राप्त गरेर नेपालकै पहिलो आईएसओ प्रमाणित सामुदायिक विद्यालय बन्ने गौरव हासिल गरेको छ। यससँगै एसएलसी तथा एसईई परीक्षामा प्रदेश र राष्ट्रियस्तरमा उत्कृष्ट नतिजा ल्याउँदै आफ्नो शैक्षिक क्षमता प्रमाणित गर्दै आएको छ।
एमबीबीएस, इञ्जिनियरिङ, नर्सिङ, कृषि, सीए, बीबीएलगायतका क्षेत्रमा पूर्ण छात्रवृत्तिमा अध्ययन गर्ने धेरै विद्यार्थी उत्पादन गरेको कान्ति माविले सामुदायिक विद्यालय पनि उत्कृष्ट हुन सक्छ भन्ने उदाहरण प्रस्तुत गरेको छ।
विद्यालयका प्रधानाध्यापक गोविन्द ज्ञवालीका अनुसार आर्थिक चुनौतीका बाबजुद सबै पक्षको सहकार्यले विद्यालयलाई यो उचाइमा पुर्याउन सम्भव भएको हो। व्यवस्थापन समितिका अध्यक्ष जीवनप्रसाद वझाले विद्यालयलाई अझ नमुना शैक्षिक संस्थाका रूपमा विकास गर्ने लक्ष्यका साथ अघि बढिरहेको बताएका छन्।
इतिहास, उपलब्धि, आधुनिकता र शैक्षिक उत्कृष्टताको संगम बनेको कान्ति माध्यमिक विद्यालय बुटवलको मात्र होइन, समग्र लुम्बिनी प्रदेशकै शैक्षिक गौरवका रूपमा स्थापित हुँदै गएको छ।
