काठमाडौं :- वर्षमान पुन ले आफ्नो पार्टीले संसदमा आलोचनात्मक प्रतिपक्षको भूमिका निर्वाह गर्ने बताएका छन्।
प्रतिनिधिसभाको पहिलो अधिवेशनको अवसरमा आज दलीय आधारमा मन्तव्य राख्दै उनले देश र नागरिकको हितमा सरकारलाई रचनात्मक सहयोग गर्ने प्रतिबद्धता जनाए।
“राष्ट्र निर्माण, सामाजिक न्याय, रूपान्तरणलगायत जनहितका विषयमा सरकारलाई सहयोग गर्न तयार छौँ,” उनले भने, “गणतन्त्र, लोकतन्त्र, सङ्घीयता र समावेशीतालगायत उपलब्धिलाई अझ सुदृढ बनाउन सहकार्य गर्नेछौँ।”
उनले आफ्नो पार्टी लोकतान्त्रिक आचरण र पद्धतिमा विश्वास राख्ने उल्लेख गर्दै नवयुवा पुस्ताले उठाएका मुद्दा सम्बोधन गर्न सरकारको ध्यान जानुपर्नेमा जोड दिए।
सांसद पुनले विगतमा नेकपा (माओवादी) ले २०६४ र नेपाल कम्युनिस्ट पार्टी (नेकपा) ले २०७४ मा प्राप्त गरेको जनमत अहिले राष्ट्रिय स्वतन्त्र पार्टी ले पाएको उल्लेख गर्दै विगतका कमजोरीबाट पाठ सिकेर अगाडि बढ्न सुझाव दिए।
