काठमाडौं :-ज्ञानबहादुर शाही ले सरकारलाई नागरिकप्रति उत्तरदायी बन्न र विधिको शासन प्रभावकारी रूपमा लागू गर्न आग्रह गरेका छन्।
प्रतिनिधिसभाको आजको बैठकमा बोल्दै उनले सरकारलाई नागरिकको अपेक्षाअनुसार काम गर्दै देशको समृद्धितर्फ अघि बढ्न सुझाव दिए। उनले भदौ २३ र २४ गते भएको नवयुवा आन्दोलनका घटनाबारे सत्यतथ्य छानबिन गर्नुपर्नेमा पनि जोड दिए।
“नेपालमा धेरै पटक व्यवस्था परिवर्तन भए पनि नागरिकको अवस्था अपेक्षाअनुसार परिवर्तन हुन सकेको छैन,” उनले भने, “देशमा भएका सबै भ्रष्टाचारका फाइल खोलिनुपर्छ।”
शाहीले प्रजातान्त्रिक मूल्य र मान्यतामा आधारित शासन सञ्चालन आवश्यक रहेको उल्लेख गर्दै नागरिकको आशा र भरोसालाई अझ बलियो बनाउनु पर्ने बताए। साथै, पछिल्लो समय दल परिवर्तनसँगै पुस्ता परिवर्तनसमेत भएकाले त्यसअनुसार काम हुनुपर्ने धारणा राखे।
गैरआवासीय नेपाली सङ्घ (एनआरएनए) का सदस्यलाई नागरिकता उपलब्ध गराउनुपर्ने माग गर्दै उनले सुशासन र विधिको शासन कायम गर्न सबै पक्ष एकजुट हुनुपर्ने बताए।
कर्णाली प्रदेशमा अपेक्षित विकास हुन नसकेको उल्लेख गर्दै उनले अन्य क्षेत्रसरह आधुनिक पूर्वाधार विकासमा ध्यान दिन सरकारलाई आग्रह गरेका छन्।
