काठमाडौ :-रवि लामिछाने ले सरकारलाई ‘हनिमुन पिरियड’ आवश्यक नरहेको बताएका छन्। प्रतिनिधि सभाको बैठकलाई सम्बोधन गर्दै उनले सरकारले सुरुदेखि नै काम गरेर देखाउन थालेको भन्दै अब परिणाममार्फत उत्तर दिने समय आएको बताएका हुन्।
उनले आफूहरू प्रश्न सोध्ने भूमिकाबाट मात्र होइन, अब उत्तर दिने जिम्मेवारीमा पनि रहेको उल्लेख गर्दै भने, “हामी प्रश्न सोधेर आएका हौँ, अब जवाफ दिने पनि समय आएको छ।” साथै, उनले प्रतिपक्षी दलहरूलाई आफ्ना कमजोरी औंल्याउन आग्रह गर्दै प्रतिपक्षको भूमिकालाई कमजोर नबनाउने प्रतिबद्धता व्यक्त गरे।
लामिछानेले संसदमा अभिव्यक्ति स्वतन्त्रताको सम्मान गर्ने बताउँदै अब आफूले सुन्न नचाहेको कुरा बोले पनि माइक नकाटिने स्पष्ट पारे। उनले विगतमा भएका राजनीतिक नियुक्तिहरूलाई स्वेच्छाले मार्गप्रशस्त गर्न आग्रह गर्दै सरकार पारदर्शी प्रशासनका लागि प्रतिबद्ध रहेको बताए।
उनले जेनजी आन्दोलनको सन्दर्भ उठाउँदै शहीदहरूको बलिदानमाथि अन्याय हुने कुनै पनि कार्यमा कारबाही गरिने स्पष्ट गरे। यस्तो कारबाहीलाई प्रतिशोधका रूपमा नबुझ्न उनले आग्रह गरे।
त्यसैगरी, संसदको रोष्ट्रमबाटै दलित समुदायमाथि भएको विभेदप्रति माफी माग्दै उनले उक्त माफीलाई न्यायमार्फत सुनिश्चित गरिने बताए। महिलाहरूको सशक्तीकरण र समान अवसर सुनिश्चित गर्न सरकार प्रतिबद्ध रहेको पनि उनले स्पष्ट पारे।
