काठमाडौं :-नेपाली संगीत क्षेत्रमा सक्रिय गायक तथा सिर्जनाकार सन्तोष खत्री ले आफ्नो सांगीतिक यात्रालाई नयाँ दिशातर्फ अघि बढाउने घोषणा गरेका छन्। लोक दोहोरी गीतमार्फत आफ्नो पहिचान बनाएका खत्री अब आधुनिक पप तथा ब्यान्ड शैलीका गीतहरूमा केन्द्रित भएर काम गर्ने तयारीमा छन्।
सामाजिक सञ्जालमार्फत सार्वजनिक सन्देशमा उनले समयअनुसार संगीतमा नयाँ प्रयोग आवश्यक रहेको उल्लेख गर्दै नयाँ साउन्ड, नयाँ भिब र फरक शैलीका गीतहरू प्रस्तुत गर्ने बताएका छन्। उनका अनुसार आगामी दिनहरूमा दर्शक–श्रोताहरूले आधुनिक संगीतको स्वादसँगै मौलिक भावना झल्किने पप तथा ब्यान्डमा आधारित परियोजनाहरू सुन्न पाउनेछन्।
यस नयाँ यात्रामा चर्चित संगीत संयोजक बिनोद रसाइली ले पनि साथ दिने जानकारी प्राप्त भएको छ। खत्री र रसाइलीबीचको सहकार्यले आगामी परियोजनाहरूलाई थप प्रभावशाली बनाउने अपेक्षा गरिएको छ।
“लोक दोहोरीले मलाई चिनायो र माया दियो। अब म नयाँ दिशामा अघि बढ्दै, फरक अनुभव दिने प्रयासमा छु,” खत्रीले बताएका छन्।
उनले नयाँ यात्रामा आफ्ना दर्शक तथा श्रोताहरूको साथ, माया र समर्थनको अपेक्षा पनि व्यक्त गरेका छन्।
सन्तोष खत्री नेपाली संगीत क्षेत्रमा निरन्तर सक्रिय कलाकारका रूपमा परिचित छन् र उनका विभिन्न गीतहरू डिजिटल प्लेटफर्ममार्फत सार्वजनिक भइसकेका छन्।
