बुटवल :- निर्वाचनको मौन अवधिमा आचारसंहिता विपरीत गतिविधि गरेको आरोप लागेपछि रुपन्देही निर्वाचन क्षेत्र नं. २ मा राष्ट्रिय स्वतन्त्र पार्टी (रास्वपा) र नेकपा एमालेका कार्यकर्ताबीच विवाद भएको छ ।
बुटवल उपमहानगरपालिका–९ इँटाभट्टी टोलस्थित नमोबुद्ध होटल, जहाँ रास्वपाको सचिवालय रहेको छ, त्यहाँ दुवै पक्षबीच धक्कामुक्का भएको प्रहरीले जनाएको छ ।
रास्वपा उम्मेदवार सुलभ खरेलले मौन अवधिमा आचारसंहिता उल्लंघन गरेको भन्दै एमाले कार्यकर्ताहरू होटलमा प्रवेश गरेपछि केहीबेर विवाद भएको बताइएको छ । एमाले कार्यकर्ताहरूले खरेलसहितका रास्वपा कार्यकर्ताहरूले आर्थिक चलखेल गरिरहेको आरोप लगाएका छन् ।
यता रास्वपा उम्मेदवार खरेलले भने आफूहरू होटलमा बसिरहेका बेला अज्ञात समूह आएर सचिवालयमा रहेका कार्यकर्तामाथि निर्घात कुटपिट गरेको दाबी गरेका छन् ।
रुपन्देही प्रहरी प्रमुख प्रहरी उपरीक्षक जनकबहादुर शाहीले भने होटलमा दुई पक्षबीच सामान्य झगडा भएको पुष्टि गर्दै रास्वपा उम्मेदवार सुलभ खरेलमाथि कुनै आक्रमण नभएको स्पष्ट पारे । “एक होटलमा दुई पक्षबीच झगडा भएको जानकारीपछि प्रहरी परिचालन गरेका छौं,” उनले भने, “बाहिर हल्ला भएजस्तो उम्मेदवारमाथि कुनै आक्रमण भएको छैन ।”झगडामा संलग्न व्यक्तिहरूको खोजी कार्य जारी रहेको, घटनाबारे अनुसन्धान भइरहेको र अवस्था नियन्त्रणमै रहेको प्रहरीले जनाएको छ ।
