बुटवल: रुपन्देही क्षेत्र नं–२ बाट नेपाली कम्युनिष्ट पार्टीका उम्मेदवार सुवास पाण्डे ‘विश्वदीप’ले आफ्नो घरदैलो अभियानलाई तीव्र बनाएका छन्। बुटवल, तिलोत्तमा र सैनामैना क्षेत्रमा प्रत्यक्ष भेटघाट गर्दै उनी मतदातासँग प्रत्यक्ष संवाद गरिरहेका छन्।
उनी मात्र आफ्नो योजना सुनाउँदै सीमित छैनन्, मतदाताका गुनासा र सुझावहरू समेत संकलन गरी कार्ययोजना बनाउने प्रतिबद्धता व्यक्त गरेका छन्। विश्वदीपले भने,”बोलेको कुरा व्यवहारमा लागू गर्ने प्रयास गर्नेछु। जनतालाई ढाट्ने काम मबाट हुँदैन।”उनी तिनाउखोला छेउका सुकुम्बासी वस्तीमा पुगे, जहाँ वासिन्दाले दानव र तिनाउ नदी नियन्त्रण, तिनाउ करिडोर निर्माण र सुरक्षित बसोबासको माग राखे। उम्मेदवारले दीर्घकालीन समाधानका लागि नीति र व्यवहारमा पहल गर्ने प्रतिवद्धता जनाए।
कृषकसँग पनि उनले संवाद गर्दै, उत्पादन–बजार सञ्जालमा समन्वय, सिंचाई, मल–बीउ र उपकरण उपलब्ध गराउने योजना सुनाए।
“कृषिलाई व्यवसायिक बनाउनु जरुरी छ, राज्यको समन्वय बिना कृषकको जीवनस्तर सुधार हुँदैन,” उनले भने।
पार्टीले क्षेत्रभरि प्रचार कार्यालय स्थापना गरी घरदैलो अभियानलाई सहज बनाएको छ। नारायण जी सी ‘निर्मल’का अनुसार उम्मेदवार र कार्यकर्ताहरू दैनिक दुई चरणमा भेटघाट र अन्तरक्रिया गरिरहेका छन्।
विश्वदीपले मतदातालाई जेनजी आन्दोलनको मर्म र तारा चिन्हमा मतदान गर्न आव्हान गर्दै विजयी हुने विश्वास व्यक्त गरे।
