बुटवल :- तीज नजिकिँदै गर्दा भेटघाट, नाचगान र रमाइलो गर्ने तयारी थियो। तर रसुवाको भोटेकोशीमा आएको बाढीले नागरिकको जनजीवन प्रभावित बनाएपछि गुल्मी जोहाङ–रूपन्देही सम्पर्क समाजले उत्सवभन्दा मानवीय सेवालाई प्राथमिकता दिएको छ।
समाजले पूर्वनिर्धारित तीज मिलन कार्यक्रम स्थगित गर्दै त्यसमा खर्च हुने रकम कटौती गरी ५१ हजार रुपैयाँ बाढीपीडितको राहत तथा उद्धारमा सहयोग गर्ने निर्णय गरेको हो।
समाजका अध्यक्ष फर्सुराम भण्डारीको अध्यक्षतामा २०८३ साल भदौ १४ गते बसेको बैठकले भदौ २० गते आयोजना गर्ने भनिएको तीज मिलन कार्यक्रम स्थगित गर्ने निर्णय गरेको समाजका सचिव अर्जुन ज्ञवालीले जानकारी दिए।
उनका अनुसार कार्यक्रमका लागि हुने खर्च कटौती गरी ५१ हजार रुपैयाँ प्रधानमन्त्री दैवी प्रकोप उद्धार कोषमा जम्मा गर्ने निर्णय गरिएको छ।
तीज नेपाली समाजको महत्वपूर्ण सांस्कृतिक पर्व भए पनि विपद्को घडीमा रमाइलोभन्दा पीडित नागरिकको आवश्यकता ठूलो हुने महसुस गर्दै कार्यक्रम स्थगित गरिएको समाजले जनाएको छ।
भोटेकोशीको बाढीबाट प्रभावित परिवारहरू राहत, उद्धार र पुनःस्थापनाको प्रतीक्षामा रहेका बेला आफ्नो एउटा उत्सव स्थगित गरेर भए पनि उनीहरूको दुःखमा साथ दिन समाज अघि सरेको हो।
समाजको यो निर्णयले पर्वको वास्तविक खुसी केवल आफू रमाउनुमा नभई अप्ठ्यारोमा परेको अर्को मानिसको हात समात्नुमा पनि हुन्छ भन्ने सन्देश दिएको छ।तीज यसपटक नाचगान गरेर नमनाइएला, तर विपद्मा परेका नागरिकको पीडामा थोरै भए पनि मल्हम लगाउन सकियो भने त्यही नै सबैभन्दा ठूलो उत्सव हुने समाजको भावनामा देखिन्छ।
