देवदह :- नेपाली काँग्रेसबाट रुपन्देही क्षेत्र नं. १ का प्रतिनिधिसभा सदस्य उम्मेदवार हिराबहादुर खत्रीले मतदाताको चाहना र आवश्यकतालाई बुझ्दै घरदैलो कार्यक्रम सञ्चालन गर्नुभएको छ।
रुपन्देही क्षेत्र नं. १ अन्तर्गत पर्ने देवदह तथा तिलोत्तमा नगरपालिकाका विभिन्न वडामा घरदैलो गर्दै उम्मेदवार खत्रीले मतदातासँग प्रत्यक्ष भेटघाट गरी सुझाव संकलन गर्नुभएको हो।
शुक्रबार तिलोत्तमा नगरपालिका वडा नं. १७ सहित विभिन्न टोलमा घरदैलो गर्दै उहाँले नागरिकको आवश्यकता र नवयुवाको चाहनाअनुसार काम गर्ने प्रतिबद्धता व्यक्त गर्नुभयो।
उहाँले क्षेत्र नं. १ कृषि सम्भावना बोकेको क्षेत्र भएकाले कृषि क्षेत्रको विकास, आधुनिक प्रविधिको प्रयोग तथा कृषिबाट आत्मनिर्भर बन्ने आधारहरू पहिचान गरी योजना अघि बढाउने बताउनुभयो।
घरदैलोका क्रममा खत्रीले कृषिको सम्भावना, कृषिक्रान्ति, दीर्घकालीन योजना तथा भावी रणनीतिका विषयमा मतदातासँग छलफल गर्नुभएको थियो। कृषिमा आत्मनिर्भर किसानलाई प्रोत्साहन गर्न रणनीतिक योजना तयार पार्दै आएको उहाँको भनाइ छ।
