कपिलवस्तु :- कपिलवस्तु क्षेत्र नम्बर २ मा प्रतिनिधिसभा निर्वाचनको सरगर्मी बढ्दै जाँदा हेल्मेट चिन्हका उम्मेदवार अरुण तिवारी जनताको विश्वास र अपेक्षाको केन्द्रमा देखिनु भएको छ। चुनावी अभियानसँगै उहाँ गाउँ–टोल, बस्ती, चोक–चौतारामा पुगेर स्थानीयसँग प्रत्यक्ष संवाद गर्दै जनजीवनका वास्तविक समस्या बुझ्ने प्रयासमा जुटिरहनु भएको छ।
स्थानीय नागरिकसँगको भेटघाट तथा छलफलका क्रममा उम्मेदवार तिवारीले शिक्षा, स्वास्थ्य, कृषि, रोजगारी र आधारभूत पूर्वाधारलाई आफ्नो प्रमुख एजेन्डा बनाएको स्पष्ट पार्नुभयो। वर्षौँदेखि समाधान हुन नसकेका समस्या, अधुरा विकास योजना र राज्यको पहुँच नपुगेका क्षेत्रप्रति उहाँले गम्भीर चासो व्यक्त गर्नुभएको छ।
राजनीति सत्ता प्राप्तिका लागि मात्र नभई जनताको सेवा र भरोसाको जिम्मेवारी भएको उल्लेख गर्दै तिवारीले भन्नुभयो, “जनताले दिएको विश्वास नै मेरो सबैभन्दा ठूलो शक्ति हो।” प्रतिनिधिसभामा पुगेपछि कपिलवस्तु क्षेत्र नम्बर २ का जनसमस्यालाई मजबुत रूपमा उठाउने उहाँको प्रतिबद्धता छ।
उहाँले नीति निर्माणको तहमा स्थानीय आवश्यकतालाई प्राथमिकतामा राख्ने, विकास निर्माणका काममा पारदर्शिता कायम गर्ने तथा योजनालाई परिणाममुखी बनाउने धारणा व्यक्त गर्नुभएको छ। साथै, युवालाई रोजगारीसँग जोड्ने कार्यक्रम, कृषकलाई उत्पादन र बजार सुनिश्चित गर्ने योजना तथा शिक्षा र स्वास्थ्य क्षेत्रको सुधारमा विशेष ध्यान दिने उहाँको भनाइ छ।
स्थानीय बासिन्दाहरूले पनि उम्मेदवार तिवारीलाई सरल, जनमुखी र समस्या सुन्ने नेताका रूपमा लिँदै आशा र भरोसा व्यक्त गरेका छन्। लामो समयदेखि अपेक्षित परिवर्तनका लागि नयाँ सोच, इमानदार र जवाफदेही नेतृत्व आवश्यक रहेको जनताको बुझाइ छ।
चुनावी चहलपहल तीव्र बन्दै जाँदा कपिलवस्तु क्षेत्र नम्बर २ मा जनताको विश्वास र अपेक्षाको केन्द्रमा हेल्मेट चिन्हका उम्मेदवार अरुण तिवारी देखिनु भएको छ।
