बुटवल :-बुटवलस्थित यातायात व्यवस्था कार्यालय परिसरबाट सेवाग्राहीलाई सहजीकरण गरिदिने नाममा कमिसन लिने दुई जना बिचौलियालाई प्रहरीले पक्राउ गरेको छ।
सादा पोशाकमा निगरानी गर्दै आएको प्रहरीले बिहीबार दिउँसो उनीहरूलाई नियन्त्रणमा लिएको हो। पक्राउ पर्नेमा कपिलवस्तु शिवराज नगरपालिका–५ चन्द्रौटाका २५ वर्षीय सरोज खनाल र गुल्मी छत्रकोट गाउँपालिका घर भई हाल बुटवल–१३ बेलबास बस्दै आएकी ३७ वर्षीया कुसुम मरासिनी रहेकी छन्।
इलाका प्रहरी कार्यालय बुटवलका प्रमुख डीएसपी निशान्त श्रीवास्तव का अनुसार दुवै जनालाई नियन्त्रणमा लिएर थप अनुसन्धान अघि बढाइएको छ।
प्रहरीले कार्यालयभित्र हुने भ्रष्टाचार तथा अनियमितता नियन्त्रणका लागि निगरानी कडा बनाइएको जनाएको छ। साथै, सेवा प्रवाहलाई व्यवस्थित र सहज बनाउन कार्यालय परिसरमै नागरिक सहायता कक्ष स्थापना गरिएको पनि जानकारी दिएको छ।
यस कदमले सेवाग्राहीलाई ठगी तथा अनावश्यक झन्झटबाट जोगाउन मद्दत पुग्ने अपेक्षा गरिएको छ।
