रुपन्देही :- जिल्लाका नागरिकलाई अत्यावश्यक सेवा प्रदान गर्ने महत्वपूर्ण सरकारी निकायका रूपमा रहेको तथ्याङ्क कार्यालय, रुपन्देही ले सेवा प्रवाहलाई प्रभावकारी, पारदर्शी र नागरिकमैत्री बनाउन पछिल्लो समय विभिन्न सुधारका प्रयास अघि बढाएको छ।
कार्यालयको वर्तमान अवस्था, सेवा प्रवाह, देखिएका समस्या र आगामी योजनाबारे कार्यालय प्रमुख विपिन कुमार पाजियारसँग गरिएको कुराकानीले कार्यालयभित्रको वास्तविक अवस्था उजागर गरेको छ।
कुराकानीका क्रममा कार्यालय प्रमुख पाजियारले सेवाग्राहीलाई सहज, छरितो र विश्वासयोग्य सेवा दिने उद्देश्यका साथ कार्यालय सक्रिय रूपमा काम गरिरहेको बताउनुभयो। सेवाग्राहीको समय र झन्झट कम गर्ने लक्ष्यसहित प्रक्रियागत सुधार, कर्मचारी परिचालन तथा व्यवस्थापनमा विशेष ध्यान दिइएको उहाँको भनाइ छ।
उहाँका अनुसार कार्यालयमा सेवाग्राहीको चाप दिनप्रतिदिन बढ्दै गएको छ। सीमित जनशक्ति र स्रोतसाधनका बाबजुद पनि नागरिकले समयमै सेवा पाउन सकून् भन्ने उद्देश्यले प्राथमिकताका आधारमा काम भइरहेको छ।
“नागरिकको विश्वास नै हाम्रो सबैभन्दा ठूलो शक्ति हो,” उहाँले भन्नुभयो, “त्यसैले सेवा प्रवाहमा ढिलासुस्ती हुन नदिन हामी निरन्तर प्रयासरत छौँ।”
कुराकानीमा कार्यालय प्रमुख पाजियारले कार्यालयले भोगिरहेका चुनौतीहरू पनि खुलेर प्रस्तुत गर्नुभयो। जनशक्ति अभाव, सेवासम्बन्धी जानकारीको कमी, प्रक्रियागत जटिलता तथा सीमित भौतिक संरचना प्रमुख समस्या रहेको उहाँले स्वीकार गर्नुभयो। हाल कार्यालय साँघुरो र सीमित स्थानमा सञ्चालन भइरहेकाले सेवाग्राही र कर्मचारी दुवैलाई असहज भइरहेको अवस्था रहेको बताइयो।
यद्यपि, यी चुनौती समाधानका लागि सरोकारवाला निकायसँग समन्वय, कर्मचारीको क्षमता अभिवृद्धि तथा प्रविधिको प्रयोगलाई प्राथमिकतामा राखिएको उहाँले जानकारी दिनुभयो। सेवाग्राहीमैत्री वातावरण सिर्जना गर्न गुनासो सुनुवाइ प्रणालीलाई सक्रिय बनाइएको र नागरिकका सुझावलाई कार्यान्वयनमा लैजाने प्रयास भइरहेको पनि उहाँको भनाइ छ।
तथ्याङ्क कार्यालय रुपन्देहीले कपिलवस्तु, रुपन्देही र नवलपरासी (बर्दघाट–सुस्ता पश्चिम) कार्यक्षेत्र समेट्दै सेवा दिँदै आएको छ। व्यापक कार्यक्षेत्रका कारण पनि सेवाग्राहीको चाप बढी रहेको कार्यालयको भनाइ छ।
अन्त्यमा कार्यालय प्रमुख पाजियारले आगामी दिनमा सेवा अझ सरल, छरितो र प्रभावकारी बनाउने प्रतिबद्धता व्यक्त गर्नुभयो।
“नागरिकको अपेक्षा पूरा गर्न कार्यालय सधैँ जिम्मेवार भएर काम गर्नेछ,” उहाँले विश्वास व्यक्त गर्नुभयो।
