बुटवल ;- रुपन्देही उद्योग संघको आयोजनामा ‘समृद्ध नेपाल निर्माणको आधार, स्वदेशी उद्यमशीलताको विस्तार’ भन्ने मूल नाराका साथ भाेलि बिहीबारदेखि बुटवलमा १६औँ राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव–२०८२ सुरु हुँदैछ।
प्रदर्शनीको उद्घाटन अर्थमन्त्री डा. रामेश्वर खनालले गर्नु हुनेछ। उद्घाटन कार्यक्रम दिउँसो २ः१६ मा हुने आयोजकले जनाएको छ। प्रदर्शनी उद्घाटनका लागि आवश्यक सबै तयारी पूरा भएकाे जानकरी गराएकाे छ।
बुटवल मण्डपमा निर्माणाधीन अन्तर्राष्ट्रिय प्रदर्शनी केन्द्रमा पहिलो पटक आयोजना हुन लागेको यस प्रदर्शनीमा विभिन्न प्रकृतिका ५ सय वटा स्टल रहनेछन्। बनेका स्टलहरूलाई विभिन्न विधाका १० वटा पेभिलियनमा विभाजन गरिएको छ। प्रदर्शनीमा ३९ जिल्लाबाट सहभागिता रहेको जनाईएकाे छ।
औद्योगिक जनचेतना र्याली सम्पन्न
प्रदर्शनीको पूर्वसन्ध्यामा बुधबार औद्योगिक जनचेतना र्याली निकालिएको थियो। प्रदर्शनी स्थल बुटवल मण्डपबाट सुरु भएको र्याली राजमार्ग चौराहा, मिलनचोक, अस्पताल लाइन, ट्राफिक चोक, श्रवणपथ, सुख्खानगर हुँदै पुनः प्रदर्शनी स्थलमा आएर समापन भएको थियो।
र्यालीमा जातजाति, भेषभूषा, विद्यालय, धार्मिक संस्था, टोल विकास समिति तथा उद्योगसँग सम्बन्धित गरी ५२ संघसंस्थाहरूको सहभागिता रहेको थियो। र्याली मुल आयोजक समिति, उपसमिति सदस्य, सल्लाहकारहरूको अगुवाइमा गरिएको थियो। र्यालीमा औद्योगिक विकासका पक्षमा विभिन्न नारा लेखिएका प्लेकार्ड बोकेर सहभागिता जनाइएको थियो।
उत्कृष्ट र्यालीलाई पुरस्कार
र्याली समापनका अवसरमा सहभागी संस्थाहरूको मूल्याङ्कन गरी पुरस्कार वितरण गरिएको थियो। औद्योगिक जनचेतना ¥याली संयोजक थानेश्वर पाण्डेले दिएको जानकारीअनुसार नेवाः संस्कृति संरक्षण समाज प्रथम, क्षेत्री समाज जिल्ला कार्यसमिति नेपाल द्वितीय, कालिका मानवज्ञान माध्यमिक विद्यालय तृतीय र नेपाल लोक भजन चुटकिला संरक्षण प्रतिष्ठान, ग्रिल स्टिल तथा आल्मुनियम व्यवसायी संघ रुपन्देही तथा स्कलर्स होम सेकेन्डरी बोर्डिङ स्कुल बुटवल सान्त्वना भएका थिए।
र्यालीमा सहभागी र पुरस्कृतहरूलाई कार्यक्रमका प्रमुख अतिथि बुटवल उपमहानगरपालिकाका नगर प्रमुख खेलराज पाण्डेले प्रमाणपत्र वितरण गर्नुभएको थियो। कार्यक्रममा मूल्याङ्कन समितिका संयोजक दिलिप सापकोटाले मूल्याङ्कन प्रतिवेदन सार्वजनिक गर्नुभएको थियो।
८ लाख दर्शक, ३० करोड कारोबारको लक्ष्य
स्वदेशी उत्पादनको प्रदर्शन र बजारीकरण गर्ने मुख्य उद्देश्यका साथ सञ्चालन हुने १६औँ राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव–२०८२ मा करिब ८ लाख दर्शकले अवलोकन गर्ने र ३० करोड रुपैयाँ बराबरको आर्थिक कारोबार हुने लक्ष्य राखिएको प्रदर्शनी प्रबन्धक यादव भण्डारीले जानकारी दिनुभयो।
प्रचार–प्रसार संयोजक किरण खरेलका अनुसार प्रदर्शनीमा औद्योगिक प्रविधि, उद्योग प्रविधि, रेष्टुरेन्ट, कृषि, हस्तकला, फ्लोरिकल्चर, गार्मेन्ट, बेकरी तथा कन्फेक्सनरी, छालाजुत्ता, खाद्यान्न, आईटीलगायतका ५ सय स्टल रहनेछन्।
सांस्कृतिक कार्यक्रम र प्रतियोगिता
प्रदर्शनीलाई मनोरञ्जनात्मक बनाउन लोकदोहोरी प्रतियोगिता, ख्यातिप्राप्त आधुनिक गायक–गायिका, हास्य कलाकार, ब्याण्डहरूको सांगीतिक कार्यक्रम, विद्यालयस्तरीय लोकनृत्य तथा वक्तृत्वकला प्रतियोगिता, प्रदर्शनी आइडल, भजन प्रतियोगितालगायत कार्यक्रमहरू आयोजना गरिने सांस्कृतिक उपसमिति संयोजक लालप्रसाद बस्यालले जानकारी दिनुभयो।
प्रदर्शनीमार्फत उद्योगी र उपभोक्ताबीच प्रत्यक्ष सम्पर्क, उत्पादित वस्तुहरूको बजार प्रवर्द्धन, गुणात्मक प्रतिस्पर्धा विकास, प्रविधि आदान–प्रदान, पर्यटन प्रवर्द्धन तथा गोष्ठी र अन्तरक्रियासमेत गरिने सचिव तथा परिचयपत्र उपसमिति संयोजक अशोक कुँवरले जानकारी दिनुभयो।
