बुटवल :- वैदेशिक रोजगारीको दौड भइरहेको बेला बुटवलकी रुचिका पोख्रेल भुसालले भने स्वदेशमै बसेर स्वास्थ्य सेवा व्यवसायमार्फत जीवनको नयाँ पहिचान निर्माण गरेकी छन्। उनले बुटवल–८, श्रवणपथ हस्पिटल लाइनमा सञ्चालनमा ल्याएको “रुचिका हेल्थ क्लिनिक (मुटु रोग उपचार केन्द्र)” छोटो समयमै बिरामीका लागि सहज र भरपर्दो सेवा केन्द्रका रूपमा स्थापित हुन थालेको छ।
फार्मेसी विषयमा स्वास्थ्य विज्ञान अध्ययन पूरा गरेपछि विदेश जाने धेरै अवसर हातमा आए पनि उनले नेपालमै सेवा दिने निर्णयलाई प्राथमिकता दिइन्। “देशमा केही गर्न सकिँदैन भन्ने मानसिकता परिवर्तन गर्नुपर्छ। सीपलाई यहाँ लगानी गरे पनि सफल हुन सकिन्छ,” उनले भनिन्।
पढाइपछि करिब पाँच वर्ष बुटवलका निजी अस्पतालमा काम गर्दै अनुभव, सीप र आत्मविश्वास थपेपछि रुचिकाले आफ्नै सेवा–मोडेल बनाउने सपना बोकेकी थिइन्। त्यही लक्ष्यसहित उनले २०८२ श्रावणमा क्लिनिक सञ्चालनमा ल्याइन्। सुरुवाती चरणमा आर्थिक जोखिम, व्यवस्थापन चुनौती र बढ्दो प्रतिस्पर्धाबीच पनि क्लिनिकले समयमै उपचार, स्पष्ट परामर्श र बिरामी केन्द्रित सेवा का कारण विश्वास जित्दै गएको छ।
हाल क्लिनिकमा मुटुरोग उपचार, प्रसूति तथा स्त्रीरोग, बालरोग, सामान्य स्वास्थ्य परामर्श तथा नियमित स्वास्थ्य परीक्षण जस्ता सेवा उपलब्ध छन्। क्लिनिक व्यवस्थापक कृष्ण पोख्रेलका अनुसार केही महिनामै सेवाग्राहीको संख्या उल्लेख्य रूपमा बढेको छ।
क्लिनिकमा जनरल फिजिसियन (पेट, छाती, मुटु, नसाशास्त्र तथा मधुमेह) डा. काशिराम विश्वकर्मा, बालरोग विशेषज्ञ डा. धनमाया घर्ति मगर, र प्रसूति–स्त्रीरोग विशेषज्ञ डा. बिपिन जयसवाल सेवा प्रदान गर्दै आएका छन्।
नजिकमै गुणस्तरीय स्वास्थ्य सेवा पाएकोमा सेवाग्राहीहरू खुसी देखिन्छन्। “पहिले सानो परीक्षणका लागि पनि टाढा जानुपर्थ्यो, अब नजिकै राम्रो सेवा पाउँदा धेरै सहज भएको छ,” एक सेवाग्राहीको प्रतिक्रिया छ।
रुचिकाले आगामी दिनमा क्लिनिकलाई डिजिटल रेकर्ड सिस्टम, निःशुल्क स्वास्थ्य शिविर, मोबाइल हेल्थ क्याम्प लगायतका कार्यक्रममार्फत विस्तार गर्ने योजना बनाएकी छन्।
उनका अनुसार परिवारको निरन्तर हौसला र सहयोगले यो यात्रामा अगाडि बढ्न ऊर्जा मिलेको छ। “बुबा–आमा, श्रीमान, दाजु–भाइहरूको साथ र विश्वासकै कारण आज यो स्थानमा आएकी हुँ,” उनले भनिन्, “आगामी दिनमा पनि सबैको सुझाव, सहयोग र माया लिएर अझ राम्रो सेवा दिने लक्ष्य छ।”रुचिकाको यो कदम स्वदेशमै अवसर खोज्ने युवाहरूका लागि प्रेरणादायी मिसाल बन्दै गएको छ।
