बुढानिलकण्ठ, काठमाडौं :- समिति अध्यक्ष इन्द्र थापा : “धार्मिक परम्पराको संरक्षण र पर्यटकीय प्रवर्द्धन हाम्रो मुख्य लक्ष्य हो”
धार्मिक आस्था, सांस्कृतिक परम्परा र ऐतिहासिक महत्वको केन्द्रका रूपमा चिनिने बुढानिलकण्ठ मन्दिर परिसरमा यस वर्षको ऐकादशी मेला भव्य रूपमा मनाउन तयारी तीव्र गतिमा अघि बढाइएको छ। मन्दिर व्यवस्थापन समितिका अध्यक्ष इन्द्र थापाका अनुसार, यस वर्षको मेला विगतका वर्षभन्दा अझ व्यवस्थित, आकर्षक र श्रद्धालुमैत्री बनाउन विशेष योजना बनाइएको छ।
थापाले बताउनुभयो —“ऐकादशी मेला केवल धार्मिक पर्व होइन, यो हाम्रो समुदायको एकता र सांस्कृतिक पहिचानको प्रतीक हो। दर्शनार्थीहरूलाई सहज र सुरक्षित वातावरणमा पूजा–दर्शन गर्न सकुन् भन्ने हाम्रो प्रमुख उद्देश्य हो।”
समितिले यस वर्षको मेलामा भजन–कीर्तन, सांस्कृतिक प्रस्तुति, वेद–पुराण प्रवचन, निःशुल्क स्वास्थ्य शिविर, धार्मिक मेलापोखरा सरसफाइ अभियान लगायतका कार्यक्रम सञ्चालन गर्ने तयारी गरेको छ।
थापाका अनुसार, भक्तजनहरूको सुविधाका लागि पानी, शौचालय, विश्रामस्थल र आकस्मिक स्वास्थ्य सेवा पनि उपलब्ध गराइनेछ। साथै, ट्राफिक व्यवस्थापन, पार्किङ क्षेत्र विस्तार र प्रहरी सुरक्षाको समन्वयमा विशेष व्यवस्था मिलाइएको छ।
मेला अवधिभर देशका विभिन्न स्थानहरूका साथै विदेशबाट समेत भक्तजन आउने अनुमान गरिएको छ।
अध्यक्ष थापाले थप्नुभयो — “हामीले यो वर्ष मन्दिर क्षेत्रको सौन्दर्यकरण र सरसफाइमा विशेष जोड दिएका छौँ। बुढानिलकण्ठ मन्दिर केवल पूजा गर्ने स्थान मात्र होइन, नेपालको धार्मिक पर्यटनको प्रमुख केन्द्र हो भन्ने सन्देश सम्पूर्ण जगतलाई दिन चाहन्छौं।”
समितिले मन्दिरको संरक्षण, ढोकाघर व्यवस्थापन, पुराना संरचनाको मर्मत र नयाँ आगन्तुक केन्द्र निर्माणका लागि पनि दीर्घकालीन योजना अघि बढाएको जनाएको छ।
स्थानीय युवाहरू र स्वयंसेवक समूहले मेला अवधिभर स्वच्छता, दर्शन व्यवस्थापन र सूचना सहयोगमा भूमिका निर्वाह गर्ने भएका छन्।
नगरपालिका र स्थानीय निकायसँग पनि सहकार्य गरी सडक, बत्ती र खानेपानी सुधारका कामहरू पूरा गर्ने तयारी भइरहेको अध्यक्ष थापाले जानकारी दिनुभयो।
