बुटवल :-रुपन्देहीस्थित साई कृपा चिया उद्योग प्रालिले उत्पादन गरेको ‘साई कृपा गोल्ड चिया’को एक ब्याच प्रयोगशाला परीक्षणमा दूषित पाइएपछि खाद्य प्रविधि तथा गुण नियन्त्रण विभागले बजारबाट तत्काल फिर्ता गर्न निर्देशन दिएको छ।
विभाग तथा मातहतका निकायले बजार अनुगमन तथा निरीक्षणका क्रममा संकलन गरेको नमुना प्रयोगशालामा परीक्षण गर्दा दूषित देखिएको हो। त्यसपछि विभागले सम्बन्धित उत्पादकलाई उक्त ब्याचका सम्पूर्ण उत्पादन बजारबाट फिर्ता लिन आदेश दिएको छ।
विभागका अनुसार फिर्ता गर्न निर्देशन दिइएको उत्पादन १ हजार ग्रामको ‘साई कृपा गोल्ड चिया’को ब्याच नं. ८३.D.०५ हो। यसको उत्पादन मिति जुलाई २०२६ रहेको छ भने उत्पादन मितिदेखि १८ महिनासम्मको उपभोग्य अवधि उल्लेख गरिएको छ।
खाद्य स्वच्छता तथा गुणस्तर ऐन, २०८१ को दफा ३८(२) बमोजिम विभागका महानिर्देशकको निर्णयअनुसार उक्त ब्याच बजारबाट तत्काल फिर्ता लिन आदेश दिइएको हो। सोही दफाको उपदफा (४) अनुसार उक्त चियाको बिक्री तथा वितरण नगर्न र नगराउनसमेत निर्देशन दिइएको छ।
विभागले बजारमा उक्त ब्याचको चिया उपलब्ध भए बिक्री–वितरण रोक्न र उत्पादकले बजारबाट फिर्ता लिनुपर्ने जनाएको छ।
उपभोक्ताले पनि आफूसँग रहेको ‘साई कृपा गोल्ड चिया’को प्याकेटमा उल्लेखित ब्याच नम्बर जाँच गर्नु उपयुक्त हुन्छ। विभागको रिकल आदेश ब्याच नं. ८३.D.०५ मा केन्द्रित रहेकाले अन्य ब्याचसमेत दूषित रहेको अर्थ लगाउन नमिल्ने उपलब्ध विवरणले देखाउँछ।
चाडपर्वको समयमा खाद्यवस्तुको खपत बढिरहेका बेला विभागले विभिन्न स्थानमा बजार अनुगमन तीव्र बनाएको छ। पछिल्ला अनुगमनमा चियासहित अन्य खाद्य पदार्थमा समेत म्याद, स्वच्छता तथा गुणस्तरसम्बन्धी समस्या भेटिएको विवरण सार्वजनिक भएको छ।
