काठमाडौं । प्रधानमन्त्री बालेन्द्र शाह वालेन ले प्रतिनिधिसभामा दिएको ‘नेपालले पनि भारतको जग्गा मिचेको रहेछ’ भन्ने अभिव्यक्तिले राष्ट्रिय राजनीति तथा कूटनीतिक वृत्तमा व्यापक बहस सिर्जना गरेको छ। प्रधानमन्त्रीले नेपाल–भारत सीमा विवादबारे बोल्दै यस्तो दाबी गरेका हुन्, तर उनले कुन स्थानमा र कस्तो आधारमा नेपालले भारतीय भूमि अतिक्रमण गरेको हो भन्ने स्पष्ट विवरण भने सार्वजनिक गरेका छैनन्।
प्रधानमन्त्रीको उक्त भनाइ सार्वजनिक भएसँगै विभिन्न राजनीतिक दल, सीमा विज्ञ तथा सरोकारवालाहरूले तथ्य र प्रमाण सार्वजनिक गर्न माग गरेका छन्। सीमा विज्ञहरूले नेपालले भारतको भूमि मिचेको भन्ने दाबीको कुनै तथ्यगत आधार नरहेको बताएका छन् भने संसदमा समेत प्रधानमन्त्रीको भनाइ स्पष्ट पार्नुपर्ने आवाज उठेको छ।
प्रमुख प्रतिपक्षी दलका सांसदहरूले प्रधानमन्त्रीको अभिव्यक्तिले नेपाल–भारत सीमा सम्बन्धी विषयमा अन्योल सिर्जना गरेको भन्दै यसको आधिकारिक आधार सार्वजनिक गर्न वा तथ्यविहीन भए संसद्को अभिलेखबाट हटाउन माग गरेका छन्।
यसैबीच प्रधानमन्त्री शाहले सीमा विवाद समाधानका लागि नेपाल र भारतबीच कूटनीतिक संवाद आवश्यक रहेको तथा ऐतिहासिक सन्धि–सम्झौताका कारण उत्पन्न समस्याबारे बेलायतसँग समेत संवाद गरिएको बताएका छन्।
प्रधानमन्त्रीको यो अभिव्यक्तिपछि सामाजिक सञ्जालदेखि राजनीतिक वृत्तसम्म तीव्र प्रतिक्रिया देखिएको छ। धेरैले राष्ट्रिय संवेदनशीलतासँग जोडिएको विषयमा सरकार प्रमुखबाट आएको यस्तो अभिव्यक्तिको तथ्यगत आधार सार्वजनिक हुनुपर्ने बताएका छन्।
अब मुख्य प्रश्न उभिएको छ—प्रधानमन्त्रीले उल्लेख गरेको ‘भारतको भूमि नेपालले मिचेको’ भनिएको स्थान कहाँ हो? र त्यसको प्रमाण के हो? सरकारले यसबारे स्पष्ट जवाफ दिनुपर्ने माग दिनप्रतिदिन बढिरहेको छ।
