पाँचथर:- युट्युबमार्फत प्रधानमन्त्री तथा शीर्ष नेताहरूविरुद्ध अपमानजनक र गालीगलौजपूर्ण सामग्री प्रसारण गरेको आरोपमा पाँचथरमा एक जना पक्राउ परेका छन्।
पक्राउ पर्नेमा फाल्गुनन्द गाउँपालिका–७ निवासी युट्युबर रोशन पोखरेल रहेका छन्। उनले सञ्चालन गरेको ‘Hades’ नामक युट्युब च्यानलमा प्रसारित सामग्रीका आधारमा कारबाही गरिएको प्रहरीले जनाएको छ।
नेपाल प्रहरीको साइबर ब्युरो को अनुसन्धानपछि जिल्ला प्रहरी कार्यालय पाँचथरले उनलाई नियन्त्रणमा लिएको हो।
प्रहरीका अनुसार उनलाई पक्राउ गरी जिल्ला अदालत पाँचथरबाट १० दिनको म्याद थप गरी साइबर अपराधसम्बन्धी मुद्दामा अनुसन्धान अघि बढाइएको छ।
जिल्ला प्रहरी कार्यालय पाँचथरका प्रमुख डीएसपी अनिश कर्ण ले घटनाबारे थप अनुसन्धान भइरहेको जानकारी दिएका छन्।यस घटनासँगै सामाजिक सञ्जालमा अभिव्यक्ति स्वतन्त्रता र साइबर अपराधबीचको सन्तुलनबारे बहस फेरि चर्किएको छ।
