काठमाडौं :- नेपाल बहुजातीय, बहुभाषिक र बहुसांस्कृतिक विशेषताले भरिपूर्ण देश हो। यही विविधताभित्र मगर समुदायको पनि महत्वपूर्ण स्थान रहेको छ। प्रत्येक वर्ष मनाइने मगर दिवसले मगर समुदायको इतिहास, पहिचान र संस्कृतिलाई उजागर गर्ने अवसर प्रदान गर्दै आएको छ।
यही अवसर पारेर उज्यालो पार्टीका गुल्मी क्षेत्र नम्बर–२ का प्रतिनिधिसभा उम्मेदवार कर्णबहादुर थापाले मगर समुदायप्रति शुभकामना व्यक्त गर्दै आफ्नो चुनावी खर्च सार्वजनिक गरेका छन्। मगर दिवसको अवसरलाई पारदर्शिता र जनउत्तरदायित्वसँग जोड्दै उनले चुनावी खर्च सार्वजनिक गरेको बताएका हुन्।
राजनीतिक क्षेत्रमा पारदर्शिता र जवाफदेहिता आवश्यक रहेको उल्लेख गर्दै थापाले लोकतन्त्रलाई बलियो बनाउन जनतासामु सबै गतिविधि खुला रूपमा राख्नुपर्ने बताए। उनले निर्वाचनका क्रममा भएको खर्च सार्वजनिक गर्नु जनप्रतिनिधि र जनताबीच विश्वास बढाउने महत्वपूर्ण अभ्यास भएको धारणा व्यक्त गरे।
मगर दिवसजस्ता पर्वले समुदायबीचको एकता, सद्भाव र आपसी सम्मानलाई अझ मजबुत बनाउने विश्वास व्यक्त गर्दै उनले मगर समुदायको भाषा, संस्कृति र परम्पराको संरक्षणमा सबैले ध्यान दिनुपर्ने बताएका छन्।
गुल्मी लगायत देशका विभिन्न स्थानमा मगर समुदायले सांस्कृतिक कार्यक्रम, सभा तथा भेटघाट गर्दै मगर दिवस मनाइरहेका छन्। यस्तो अवसरमा राजनीतिक व्यक्तित्वहरूले पनि समुदायसँग सहकार्य र एकता प्रकट गर्दै कार्यक्रममा सहभागिता जनाइरहेका छन्।
