बुटवल :- फागुन २१ लक्षित कार्यक्रमहरू तीव्र भइरहेका बेला बालेन्द्र शाहले सामाजिक सञ्जालमार्फत भावनात्मक अपिल गरेका छन्। राष्ट्रिय स्वतन्त्र पार्टी (रास्वपा)सँग सम्बद्ध शाहले रुपन्देहीमा देखिएको जनसागरलाई “संख्या होइन, भरोसा” को रूपमा व्याख्या गर्दै परिवर्तनको प्रतिबद्धता दोहोर्याएका हुन्।
उनले लेखेका छन्, “यो भीड संख्या होइन, यो भरोसा हो। यो नाराबाजी होइन, यो आशा हो।” आफू नेता भएर नभई “तपाईंहरूको प्रतिनिधि” का रूपमा उभिएको उल्लेख गर्दै उनले परम्परागत राजनीतिक शैलीभन्दा फरक अभ्यासको संकेत गरेका छन्।
स्टाटसमा भ्रष्टाचार, दलाली र ‘सेटिङ’ राजनीतिलाई अन्त्य गर्ने अठोट व्यक्त गरिएको छ। “पदका लागि सम्झौता गर्दिनँ, विश्वासमा दाग लाग्ने काम गर्दिनँ,” भन्ने प्रतिबद्धतासहित उनले जनताको भरोसालाई इमान्दारीमा रूपान्तरण गर्ने दाबी गरेका छन्।
रुपन्देहीका कार्यक्रममा देखिएको उत्साहलाई कतिपयले नयाँ शक्तिप्रतिको आकर्षणका रूपमा व्याख्या गरेका छन् भने पुराना दलप्रति बढ्दो असन्तुष्टिको संकेतका रूपमा पनि हेरिएको छ। यद्यपि विश्लेषकहरूका अनुसार सामाजिक सञ्जालमा व्यक्त भावनात्मक अपिलभन्दा कार्यसम्पादन र दीर्घकालीन नतिजाले नै जनमत निर्धारण गर्नेछ।
फागुन २१ को निर्वाचन नजिकिँदै जाँदा रुपन्देहीसहित विभिन्न क्षेत्रमा राजनीतिक गतिविधि तीव्र बनेका छन्। जनअपेक्षा, विकल्पको खोजी र सुशासनको मागबीच चुनावी माहोल थप चासोपूर्ण बन्दै गएको छ।
