काठमाडौं :- नेपाली मौलिक तीज संस्कृति, चेलीबेटीको माइतीप्रतिको आत्मीयता र पर्वको उल्लासलाई समेटिएको नयाँ तीजगीत ‘कम्मरु भाँचम्ला’ सार्वजनिक भएको छ। लोकप्रिय गायक तथा सर्जक मोतिराज खनालको प्रस्तुतिमा तयार भएको गीतको लोकप्रिय सांगीतिक कार्यक्रम ‘इन्द्रेणी’मा भव्य समारोहबीच विमोचन गरिएको हो।
श्रावण २५ गते सम्पन्न विमोचन कार्यक्रममा गायक मोतिराज खनालको अध्यक्षता रहेको थियो। कार्यक्रममा नेपाल चलचित्र कलाकार संघका अध्यक्ष तथा वरिष्ठ कलाकार उत्तम केसी प्रमुख अतिथिका रूपमा उपस्थित भई गीतको औपचारिक विमोचन गर्नुभएको थियो। कार्यक्रमको उद्घोषण समाजसेवी तथा अभियन्ता विशाल मिश्रले गर्नुभएको थियो।
विमोचन समारोहमा वरिष्ठ कलाकार पार्वती अधिकारी, ‘इन्द्रेणी’का अध्यक्ष तथा सञ्चालक कृष्ण कँडेल, ऋषिराम भुसाललगायत कलाकार, सञ्चारकर्मी, शुभेच्छुक तथा आफन्तजनको उपस्थिति रहेको थियो। कार्यक्रममा तीजगीतको मौलिकता, नेपाली लोकसंगीतको संरक्षण तथा नयाँ पुस्तामाझ लोकसंस्कृतिको प्रवर्द्धनका विषयमा समेत चर्चा गरिएको थियो।
मोतिराज खनाल, बैकुण्ठ महत र रेखा पोखरेलको स्वर रहेको ‘कम्मरु भाँचम्ला’का शब्द मोतिराज खनाल र किरण पन्थीले लेखेका हुन् भने संगीत मोतिराज खनालकै रहेको छ। गीतको संगीत संयोजन लक्षु प्रकाश मल्लले गरेका छन्। कृष्ण बाजुरालीले रेकर्डिङ तथा मिक्सिङको जिम्मेवारी सम्हालेका छन् भने गीतको रेकर्डिङ द म्युजिक एरा स्टुडियोमा गरिएको हो।
गीतको भिडियोमा भुवन के. पोखरेल, जुना कार्की, भगवान् भण्डारी र रेणुका बरालको अभिनय तथा नृत्य रहेको छ। शिवाजी क्षेत्रीको निर्देशन तथा कोरियोग्राफीमा तयार भएको भिडियोमा विभिन्न जिल्लाका चेलीहरूको सामूहिक सहभागिताले तीजको मौलिक रंगलाई थप जीवन्त बनाएको छ।
भिडियोको छायांकन सुनिल राउत तथा टिमले गरेका छन् भने विनोद बमले भिजुअल एडिट तथा कलरको जिम्मेवारी सम्हालेका छन्। मेकअप शंकर सुमनले गरेका छन्।
माइतीको मायादेखि श्रीमान्–श्रीमतीको रमाइलो सम्बन्धसम्म
‘कम्मरु भाँचम्ला’को भिडियोमा तीजको अवसरमा श्रीमती माइत जाने तयारी गरेपछि श्रीमान्ले ‘यसपालि माइत नजाऊ, सँगै नाचौँला’ भन्दै फकाउने रमाइलो प्रसंगबाट कथा अघि बढाइएको छ।
तर माइतीबाट बाबाको फोन आएपछि कथाले भावनात्मक मोड लिन्छ। यसमार्फत तीजमा छोरी–चेलीलाई माइती बोलाउने परम्परा, बाबुआमाको माया, माइतीप्रतिको आत्मीयता तथा श्रीमान्–श्रीमतीबीचको रमाइलो सम्बन्धलाई मनोरञ्जनात्मक ढंगले प्रस्तुत गरिएको छ।
पछिल्लो समय तीजगीतमा मौलिकता र सांस्कृतिक पक्षलाई प्राथमिकता दिनुपर्ने बहस चलिरहेका बेला ‘कम्मरु भाँचम्ला’ले परम्परागत तीजको भावनासँगै आधुनिक प्रस्तुति र मनोरञ्जनलाई जोड्ने प्रयास गरेको निर्माण पक्षले जनाएको छ।
गीतको प्रचार–प्रसार तथा सञ्चार सहकार्यमा देउराली दर्शन मिडिया प्रा.लि.द्वारा सञ्चालित गुल्मी बुलेटिन र क्लिक बुलेटिन मिडिया पार्टनरका रूपमा रहेका छन्। गीतलाई दर्शक–श्रोतामाझ पुर्याउन दुवै सञ्चारमाध्यमले सहकार्य गर्ने जनाइएको छ।
तीजको मौलिक स्वाद, छमछमी नाच्न मिल्ने लय र पारिवारिक कथावस्तुलाई एकैसाथ प्रस्तुत गरिएको ‘कम्मरु भाँचम्ला’ले दर्शक–श्रोताको मन जित्ने अपेक्षा गरिएको छ। गीतको म्युजिक भिडियो मोतिराज खनाल अफिसियल युट्युब च्यानलमार्फत सार्वजनिक गरिएको छ।
