गुल्मी :-बुटवलबाट बेपत्ता भएका अर्घाखाँचीका ९२ वर्षीय वृद्ध पुरुष गुल्मीको कालीगण्डकी नदीमा मृत अवस्थामा फेला परेका छन्।
जिल्ला प्रहरी कार्यालय गुल्मीका सूचना अधिकारी डीएसपी गंगाबहादुर सारुका अनुसार गुल्मीको रुरुक्षेत्र गाउँपालिका–२, तालखोलास्थित कालीगण्डकी नदीमा अर्घाखाँचीको पाणिनी गाउँपालिका स्थायी घर भई बुटवल गोलपार्कमा बस्दै आएका ९२ वर्षीय छविलाल गैरे मृत फेला परेका हुन्।
उक्त स्थानमा शव देखेपछि स्थानीयले प्रहरीलाई जानकारी गराएका थिए। सूचनापछि इलाका प्रहरी कार्यालय रिडीबाट प्रहरी टोली घटनास्थलमा खटिएको थियो। पहिचानका क्रममा मृतकका जेठा छोरा कृष्णप्रसाद गैरेले शव आफ्ना बुबा छविलाल गैरेकै भएको पुष्टि गरेका हुन्।
छविलाल गैरे पुस २७ गतेदेखि बेपत्ता रहेका थिए। उनको खोजीका लागि परिवारले प्रहरीमा निवेदन दिएको थियो भने सामाजिक सञ्जालमार्फत आफन्त तथा सर्वसाधारणलाई समेत खोजीमा सहयोग गर्न आग्रह गरिएको थियो।
शवको पहिचान भएपछि पोस्टमार्टमका लागि नदीबाट शव निकाल्ने प्रक्रिया जारी रहेको प्रहरीले जनाएको छ। घटनाबारे थप अनुसन्धान भइरहेको छ।
