बुटवल :-अर्घाखाँची जिल्लाको ऐतिहासिक, धार्मिक तथा सांस्कृतिक धरोहर मालारानी क्षेत्रको प्रचार–प्रसार र पर्यटन प्रवर्द्धन गर्ने उद्देश्यले नयाँ लोक भजन सार्वजनिक गरिएको छ।
सुमन खनालको परिकल्पनामा तयार भएको यस भजनमा लोकप्रिय गायक तथा सर्जक मोतिराज खनालको शब्द तथा संगीत रहेको छ। भजनमा मोतिराज खनाल र सुनितामी परियारको सशक्त स्वर सुन्न सकिन्छ भने एरेन्ज महेन्द्र भण्डारीले गर्नुभएको हो।
सान्सा फिल्मको प्रस्तुतिमा निर्माण गरिएको उक्त भजन मालारानी गाउँपालिकाको सहयोगमा तयार गरिएको हो। भिडियोमा लोकप्रिय कलाकार सुरबिर पण्डित, शर्मिला शर्मा, सुस्मिता बुढाथोकी, शोभाखर खनाल र राजेन्द्र रानाले प्रभावशाली अभिनय प्रस्तुत गर्नुभएको छ। भजनको निर्देशन सुरज खनालले गर्नुभएको हो।
यस भजन निर्माणमा मालारानी गाउँपालिका र मालारानी मन्दिर व्यवस्थापन समितिको सहकार्य रहेको छ। यसअघि सार्वजनिक भएको चर्चित ‘सुपा देउराली’ भजनको अपार सफलतापछि यो नयाँ भजन बजारमा ल्याइएको हो।
भजनले मालारानी क्षेत्रको धार्मिक आस्था, सांस्कृतिक पहिचान र पर्यटन प्रवर्द्धनमा महत्वपूर्ण योगदान दिने अपेक्षा गरिएको छ। भजनको अडियो मालाश्री रेकर्डिङ स्टुडियोमा रेकर्ड गरिएको हो। रेकर्डिस्ट सागर बाजुराली, मिक्सिङ खडक बाजुरालीले गर्नुभएको छ भने भिडियो सम्पादन बिनोद बमले गर्नुभएको हो। भजनको भाषा सम्पादन जनार्दन खनालले गर्नुभएको छ।
