काठमाडौं :- नेपाली सांगीतिक क्षेत्रमा नयाँ भावनात्मक गीत ‘बिर्सु कसरी’ सार्वजनिक गरिएको छ । प्रेम, बिछोड र भावनात्मक सम्बन्धको कथालाई समेटिएको गीतले सार्वजनिक भएसँगै दर्शक तथा श्रोताको ध्यान तान्न थालेको छ ।
गीतमा गायक मोतिराज खनाल र गायिका यशोदा कार्कीको स्वर रहेको छ । गीतका शब्द शंकर घिमिरे र विश्वास घिमिरेले संयुक्त रूपमा लेखेका हुन् भने संगीत स्वयं मोतिराज खनालले तयार पारेका छन् ।
गीतको संगीत संयोजन रमेश सेन्चुरीले गरेका हुन् । गीतलाई मालाश्री डिजिटल रेकर्डिङ स्टुडियोमा रेकर्ड गरिएको हो । रेकर्डिङ सागर बाजुराली र मिक्सिङ खडक बाजुरालीले गरेका छन् ।
गीतको भिडियोमा विश्वास घिमिरे, बिन्दु आचार्य, अनिशा बेल्बासे र बिशेष घिमिरेको अभिनय देख्न सकिन्छ । भिडियोको निर्देशन विश्वास घिमिरे स्वयंले गरेका हुन् ।
गाउँघरको परिवेश, हरियाली वातावरण र प्रेम–बिछोडको भावनालाई भिडियोमा कलात्मक ढंगले प्रस्तुत गरिएको छ । निर्माण टिमका अनुसार गीतले मौलिक नेपाली भावनालाई आधुनिक प्रस्तुतीकरणमार्फत दर्शकमाझ पुर्याउने प्रयास गरेको छ ।
भावनात्मक शब्द, मधुर स्वर र ग्रामीण परिवेशको संयोजनले ‘बिर्सु कसरी’लाई नेपाली संगीतप्रेमीका लागि विशेष बन्ने अपेक्षा गरिएको छ।
