बुटवल:- तिलोत्तमा नगर क्षेत्रमा सञ्चालन हुँदै आएको ऐतिहासिक तिलोत्तमा मेला यस वर्ष पनि उल्लेख्य जनसहभागितासहित उल्लासपूर्वक अगाडि बढिरहेको छ। सुरुआती तालिकाअनुसार निश्चित समयसम्म मात्र सञ्चालन हुने भनिएको मेला दर्शक र सहभागीको अत्यधिक चासोका कारण आगामी पुस ४ गतेसम्म थप सञ्चालन गरिने भएको छ।
मेलाबारे जानकारी दिँदै मेला व्यवस्थापन समितिका अध्यक्ष प्रेम बहादुर घर्तीले स्थानीयवासी मात्र नभई छिमेकी पालिकाबाट समेत उल्लेख्य सहभागिता देखिएको बताए।
“दैनिक हजारौँ दर्शकको आगमन, व्यापारीको सक्रियता र खेलकुद तथा सांस्कृतिक कार्यक्रमप्रतिको बढ्दो आकर्षणका कारण मेलाको अवधि थप गर्ने निर्णयमा पुग्यौँ,” अध्यक्ष घर्तीले बताए।
मेलाको मुख्य आकर्षणका रूपमा वडा भलिबल प्रतियोगिता रहेको छ। विभिन्न टिमबीच भइरहेको प्रतिस्पर्धाले युवायुवतीलाई खेलकुदप्रति आकर्षित गरेको छ। यसका साथै प्रतियाेगितामा, गीत–संगीत, लोकनृत्य तथा विविध सांस्कृतिक प्रस्तुतिले मेलालाई अझ जीवन्त बनाइरहेका छन्।
स्थानीय कलाकारदेखि आमन्त्रित प्रस्तोतासम्मका प्रस्तुतिले तिलोत्तमाको मौलिक संस्कृति संरक्षण र प्रवर्द्धनमा योगदान पुर्याएको आयोजकको भनाइ छ।
मेलाले स्थानीय व्यापारी र साना उद्यमीलाई राम्रो अवसर दिएको छ। खाद्य परिकार, कृषि उपज, हस्तकलाका सामग्री तथा घरेलु उत्पादनको बिक्री उल्लेख्य रूपमा बढेको छ। मेलामा राखिएका स्टलहरूले स्थानीय उत्पादनलाई बजारसम्म पुर्याउने प्रभावकारी माध्यमको काम गरिरहेका छन्।
मेला सफल बनाउन तिलोत्तमा नगरपालिका, स्थानीय संघ–संस्था, स्वयंसेवक तथा सुरक्षाकर्मीको सक्रिय भूमिका देखिएको छ। सरसफाइ, सुरक्षा र व्यवस्थापनलाई प्राथमिकतामा राख्दै मेला सञ्चालन भइरहेको आयोजक समितिले जनाएको छ।
अध्यक्ष घर्तीका अनुसार, “यो मेला केवल मनोरञ्जनको साधन मात्र होइन, स्थानीय संस्कृति, खेलकुद र आर्थिक गतिविधिलाई एकै ठाउँमा जोड्ने साझा मञ्च हो।”
मेलाको अवधि थपिएसँगै अझ धेरै दर्शकको सहभागिता हुने अपेक्षा गरिएको छ। तिलोत्तमा मेला अहिले नगरको पहिचान, सामूहिक उत्सव र सामाजिक एकताको प्रतीक बन्दै गएको छ।
