काठमाडौँ :-नेकपा एमालेका वरिष्ठ उपाध्यक्ष ईश्वर पोखरेलले पार्टीको एघारौं राष्ट्रिय महाधिवेशनमा अध्यक्ष पदका लागि उम्मेदवारी घोषणा गरेका छन्।
लामो वक्तव्य मार्फत पोखरेलले आफ्नो निर्णयको कारण खुलाउँदै भने, “पार्टी पुनर्गठन र रूपान्तरणका लागि देशभरीका साथीहरूको आग्रह र सुझाव स्वीकार गर्दै अध्यक्ष पदमा उम्मेदवारी घोषणा गरेको हुँ।” उनले आफ्नो राजनीतिक पृष्ठभूमि र भूमिगत जीवनको अनुभवलाई पनि स्मरण गर्दै सामाजिक रूपान्तरण, पार्टी निर्माण तथा राज्य व्यवस्थामा लामो समय योगदान गरेको बताए।
पोखरेलले शक्तिमा नभएर सामूहिकतामा विश्वास राख्ने आधार प्रस्तुत गर्दै भने, “राष्ट्र, जनता र पार्टीलाई सदैव शीरमा राखेको छु। जीवनका उचारचढाबमा इमान र निष्ठा कहिल्यै डगमगाएको छैन।”
उनी केपी शर्मा ओलीलाई पार्टीमा अभिभावकीय भूमिका निर्वाह गर्न आग्रह गर्दै नेतृत्व हस्तान्तरण सहज र लोकतान्त्रिक ढंगले हुने आशा व्यक्त गरेका छन्। पोखरेलले दुई कार्यकालको प्रावधान पुनःस्थापना, पार्टीको लोकतान्त्रिक संस्कार र आन्तरिक प्रतिस्पर्धालाई उच्चतम स्तरको स्वीकार्यता दिने प्रतिबद्धता पनि व्यक्त गरेका छन्।
पार्टी सञ्चालनमा सामूहिक नेतृत्व, कार्यकर्ताको सम्मान र पारदर्शी जिम्मेवारी बाँडफाँटको अभ्यास आवश्यक भएको उनको धारणा छ। साथै पोखरेलले पूर्वराष्ट्रपति विद्यादेवी भण्डारीलाई पार्टीमा सक्रिय भूमिका लिन वातावरण तयार गर्नुपर्ने प्रस्ताव राखेका छन्।
पोखरेलले महाधिवेशनपछि पार्टी स्कूल विभाग, नीति अध्ययन प्रतिष्ठान तथा देशव्यापी अन्तरक्रिया, गोष्ठी र छलफलमार्फत पार्टीको वैचारिक पक्षलाई बलियो बनाउने प्रतिबद्धता व्यक्त गरेका छन्।
उहाँको उम्मेदवारीले एमालेभित्र नेतृत्व प्रतिस्पर्धा तिव्र बनाउने र पार्टीको आन्तरिक लोकतन्त्र सुदृढ गर्ने अपेक्षा गरिएको छ।
